Շամիրամում կրակոցներից տուժածներից մեկին վիրահատել են, կյանքին այլևս վտանգ չի սպառնում

Արագածոտնի մարզի Շամիրամի գյուղի սգո սրահում հնչած կրակոցներից տուժած 6 վիրավորների առողջական վիճակում կա դրական դինամիկա:

Առողջապահության նախարարությունից Yerkir.am-ին հայտնեցին, որ Երևանի «Աստղիկ» բուժկենտրոն տեղափոխված երեք տուժածների վիճակը կայուն է:

«Եթե երեկ նրանցից մեկի վիճակը ծայրահեղ ծանր էր, ապա այսօր դրական դինամիկա է գրանցվել, և նրա վիճակը դարձել է ծանր կայուն: Երեկ տղամարդուն վիրահատել են, վիրահատությունը հաջող է անցել, նրա կյանքին վտանգ չի սպառնում»,- տեղեկացրեցին հիվանդանոցից:

Նշենք, որ տղամարդը, որի վիճակը երեկ ծայրահեղ ծանր էր, թոքերի թափանցող վիրավորում էր ստացել:

«Աստղիկ»-ում բուժվող երեք տուժածներն էլ վերակենդանացման բաժանմունքում են, սակայն նրանցից ոչ մեկի կյանքին վտանգ չի սպառնում:  

 Հիշեցնենք նաև, որ մյուս երեք տուժածներն Աշտարակի բուժկենտրոնում են, նրանց վիճակը բավարար է: Նրանք ստորին վերջույթների հրազենային վնասվածքներ էին ստացել: