Բուժհաստատություն դիմելուց առաջ շահառուն նախ պետք է տեղյակ պահի ապահովագրական ընկերությանը

Այսօր կառավարության նիստից հետո առողջապահության նախարար Լևոն Ալթունյանը լրագրողների հետ զրույցում անդրադարձավ պարտադիր բժշկական ապահովագրության ներդրման խնդրին և նշեց, որ այսօր ընդունված նախագիծը վերաբերում է միայն սոցփաթեթի շահառուների ներգրավմանը՝ ապահովագրական գործընթացի մեջ:

«Եթե մինչ օրս մենք ունեինք կանխավճարային մոդիֆիկացիա, ապա այսօր որոշում ընդունվեց, որ սեպտեմբերից այդ գործընթացը լինի ապահովագրական բանաձևով՝ այսինքն հետվճարային։ Բոլոր հայտ ներկայացրած ընկերությունների հետ կլինի համագործակցություն: Հայաստանի շուկայում գործում են վեց ապահովագրական ընկերություն, եթե չեմ սխալվում, բոլորն էլ հայտ են ներկայացրել մասնակցելու այդ ծրագրին»,-ասաց նա։

Նախարարը խոսեց վճարային համակարգի մասին, ասելով, որ մինչ այժմ ֆինանսական տարվա սկզբին հիվանդանոցներին բաշխվում է ինչ-որ լիմիտավորված գումար, այդ գումարի սահմաններում նրանք ծառայություններ են մատուցում այն քաղաքացիներին, որոնք դիմել են բուժօգնության համար: Սակայն այդ բանաձևի ամեմամեծ թերությունն այն է, որ եթե հիվանդանոցը լավ է սպասարկում և հաճախորդների շրջանում պահանջարկ ունի, նրա գումարները ավարտվում են օրացույցային տարվա ավարտից շատ ավելի շուտ և հերթեր են կուտակվում, իսկ այն հիվանդանոցները, որոնք առանձնապես վարկանիշային չեն մեր բնակչության շրջանում, նրանք այդ գումարը ունենում են մինչև տարվա վերջ, և ավելանում է այդ գումարը:

Այսուհետև սոցիալական փաթեթի աշխատակիցների համար նախատեսված գումարը չի բաշխվելու տարվա սկզբին, ստեղծվելու են ռեզերվային ֆոնդեր ապահովագրական ընկերությունների ներքո, և հաճախորդը որևէ հիվանդանոց դիմելիս միայն կզանգահարի ապահովագարական ընկերություն և տեղյակ կպահի, որ նա որոշել է բուժվել այս կամ այն բուժհաստատությունում, որից հետո ապահովագրական ընկերություն-բուժհաստատություններ հարաբերություններն են ուժի մեջ մտնում, որոնք կանոնակարգվում են այսօրվա ընդունված որոշումով։

Նախարարն ընդգծեց, որ այս նախագիծը կարելի է դիտել որպես պիլոտային նախագիծ պարտադիր առողջապահական ապահովագրության ոլորտում:

«Այս համակարգում ընդգրկվեցին 80-100 հազար շահառուներ, եթե ամեն ինչ բարեհաջող և հարթ անցնի, ապա  վեց ամիս հետո մենք կառաջարկենք մի որոշման նախագիծ, որով ևս 612 հազար քաղաքացի կանցնի այս բանաձևին, և այդ գործընթացի հաջողության դեպքում ևս մեկ տարի հետո կառաջարկենք համընդհանուր պարտադիր բժշկական ապահովագրություն»,-ասաց նա:

Նախարարը նշեց, որ այս համակարգը թույլ կտա խուսափել հերթերից, իսկ եթե հերթերը գոյանում են այն պատճառով, որ բնակչությունը ցանկանում է բուժվել հենց այդ բուժհաստատության և հենց այդ մասնագետի կողմից, ապա այդ դեպքում հերթի կարգավորումը կախված է միայն այդ բուժհաստատության կամ այդ մասնագետի թողունակությունից: «Եթե օրական մեկ անձը կարող է ընդունել 20 պացիենտ, մենք չենք կարող ստիպել նրան, որ ընդունի 40»,-ասաց նա: