Եթե հեշտ լիներ, մինչև հիմա արած կլինեինք. Սերժ Սարգսյանը՝ Կարեն Կարապետյանին

Այսօր կառավարության նիստում ՀՀ նախագահ Սերժ Սարգսյանը ելույթ ունեցավ` խոսելով կառավարության ծրագրի իրականացման մասին:

Անդրադառնալով արտաքին քաղաքական խնդիրներին` նա նշեց, որ պետք է ջանքեր գործադրվեն արտաքին քաղաքական բարենպաստ միջավայր ստեղծելու ուղղությամբ, սակայն չպետք է պատրանքներ ունենալ` ելնելով այն կանխադրույթից, որ մեր անբարյացակամ հարևանների հետ հարաբերություններում որևէ դրական փոփոխություն այժմ տեղի չի ունենում:

«Հարգելի' գործընկերներ, վերջին տարիներին ավելի հաճախ է հնչում չինացիներին վերագրվող ասացվածքը, ըստ որի` անեծք է որևէ մեկին մաղթել ապրել փոփոխությունների ժամանակաշրջանում: Կարծում եմ` նման ժամանակներում ապրելն իսկապես դժվար է, բայց` պատվախնդիր: Ուստի ակնկալում եմ, որ դուք պատվախնդրությամբ կլուծեք մեր ծրագրերի իրականացումն ու բոլորիս առջև ծառացած խնդիրները: Հավատում եմ, որ կառավարությունը, վարչապետ Կարեն Կարապետյանի գլխավորությամբ, կարող է դա անել: Անհրաժեշտ են կարծրատիպերից դուրս ստեղծագործական մոտեցումներ: Մեր ժողովուրդը հենց ձեզ է վստահել դրանք գտնելու և իրագործելու պատմական առաքելությունը: Ուրեմն շարունակենք եռանդով աշխատել: Բոլորիդ հաջողություն եմ մաղթում»,- ասաց Սերժ Սարգսյանը:

Նա դիմեց գործադիրի անդամներին` կա՞ն հարցեր: Հարցեր, ուղղված նախագահին, չկային:

Վարչապետ Կարեն Կարապետյանը արձագանքեց` ասելով, որ շատ շնորհակալ է նախագահի այցի և խոսքերի համար: «Ուզում ենք Ձեզ հավաստիացնել, որ այն ծրագիրը, որը ձևավորել է մեր թիմը, իրագործվելու է: Մենք շատ լավ հասկանում ենք, թե հասարակությունը մեզանից ինչ սպասումներ ունի, մենք շատ լավ հասկանում ենք, որ այդ ճանապարհը հեշտ չի լինելու, բայց մենք վճռականորեն ենք տրամադրված և այդ ծրագիրն իրագործելու ենք»,- ասաց վարչապետը:

Նախագահ Սարգսյանը հավելեց. «Պարո'ն վարչապետ, եթե հեշտ լիներ, մինչև հիմա ամբողջն արած-պրծած կլինեինք, բոլորս դա գիտակցում ենք»: