Եթե Հայաստանն ունենար այդ գումարները, մենք վաղուց կառուցած կլինեինք Հայաստան-Իրան երկաթգիծը. Բեգլարյան

Հայաստան-Իրան երկաթգծի կառուցմանը խանգարող հանգամանք չկա, սակայն դա մեծ ծրագիր է, մեծ գումարների մասին է խոսք. այսօր խորհրդարանում լրագրողներին ասաց ՀՀ տրանսպորտի և կապի նախարար Գագիկ Բեգլարյանը:

«Եթե Հայաստանն ունենար այդ գումարները, մենք հիմա վաղուց կառուցած կլինեինք: Այստեղ ամենամեծ խնդիրն այն է, որ կարողանանք ձեռք բերել համապատասխան պարտնյորներ և այդ երկաթգիծը կկառուցենք, շահագործենք: Անընդհատ բան է փոխվում այդ ուղղությամբ, անընդհատ աշխատանքներն ավելի են լավանում: Ամեն այցի ժամանակ, ամեն հարաբերության ժամանակ ինչ-որ բան է փոխվում, բայց ես կարող եմ ասել դրական շարժ կա»,- ասաց նախարարը:

Հարցին, թե միայն ֆինանսակա՞ն խնդիրն է, թե՞ կա նաև աշխարհաքաղաքական գործոն, Բեգլարյանը պատասխանեց. «Ֆինանսականն ամենաառաջինն է: Ես ձեզ ասեմ, որ, օրինակ, վերջերս, երբ Հայաստան էր եկել Իրանի փոխվարչապետը, նաև այդ կազմում էր քաղաքաշինության նախարարը: Մեր հարևան պետության տրամադրվածությունն այն էր, որ այդ գիծը` Իրանով Վրաստան և Հայաստան, անպայման կառուցվի»:

Պատասխանելով հարցին, թե հնարավո՞ր է Թեհրանը մտափոխվի և իր էներգետիկ ծրագրերն Ադրբեջանի միջոցով իրագործի, նախարարը նշեց. «Կոնկրետ բանակցությունների ընթացքում ես այդպիսի տպավորություն չեմ ստացել»: