Իսրայելը ժամանակին Հայաստանին առաջարկել է զենք գնել, բայց մերժում է ստացել. իսրայելցի նախկին պատգամավոր

Հայաստանի ռազմավարական դաշնակից Ռուսաստանն ավելի շատ զենք է մատակարարում Ադրբեջանին, քան Իսրայելը. այսօր լրագրողներին ասաց Իսրայելի խորհրդարանի նախկին պատգամավոր Ալեքսանդր Ցինկերը՝ խոսելով Իսրայելի կողմից Ադրբեջանին սպառազինություն մատակարարելու մասին:

«Եկեք Իսրայելի կողմից սպառազինությունների վաճառքի վերաբերյալ կոնկրետ խոսենք: Իսրայելն այն 5 երկրներից է, որոնք ռազմական սարքավորումներ ու տեխնիկա են մատակարարում: Մենք չենք թաքցնում, որ, համաձայն բաց աղբյուրների, Իսրայելի ռազմական արդյունաբերությունը տարեկան 5-6 մլրդ դոլարի եկամուտ ունի: Շատ հնարավոր է, որ այդ թիվը մեծ լինի, քանի որ կան ինչ-ինչ մասնավոր ընկերություններ, որ իրավունք ունեն համագործակցելու երկրի պաշտպանության նախարարության հետ»,-ասաց նա և նշեց, որ ժամանակին Հայաստանին էլ է առաջարկվել որոշակի ռազմական սարքավորումներ ձեռք բերել, սակայն հայկական կողմը մերժել է: «Ի պատասխան իսրայելական կողմի առաջարկի՝ Հայաստանի պաշտպանության նախկին նախարարն ասել է, որ դա թանկ է և ձեռնտու չէ»,- ասաց Ցինկերը և հավելեց. «Գնդակը Հայաստանի կողմում է, մենք բաց ենք, եթե ցանկություն կա, մենք կքննարկենք այդ հարցը»: