Կամաց-կամաց գոտիները պետք է ձգել. Վարդան Արամյան

 ԱԺ-ում 2016-ի բյուջեի կատարողականի քննարկման ժամանակ ՀՀԿ խմբակցության պատգամավոր Ռուզաննա Մուրադյանը հետաքրքրվեց` եթե ՀՀ ֆինանսների նախարար Վարդան Արամյանի զեկույցում ներկայացված ծախսերը ճիշտ և արդարացված են, ապա արդյո՞ք պետբյուջեի ծախսերի կառուցվածքը թույլ է տալիս մտածել, որ դժվարությունները հաղթահարելու ենք և մոտ ապագայում արագ տնտեսական աճ ենք ունենալու:

«Կարող ենք հավակնել, բայց իրագործելության տեսանկյունից բարդ է լինելու», - նշեց նախարարը՝ ասելով, որ տնտեսական աճի համար կապիտալ ծախսեր են անհրաժեշտ:

Արամյանը նշեց, որ թեև ծախսերի կրճատումն անկման ժամանակաշրջանում վատ է, բայց ծախսերի վերաիմաստավորում պիտի լինի: «2016 թվականին մենք կապիտալ ծախսերը նույնիսկ գերակատարել ենք, որպեսզի կարողանանք օգնել տնտեսությանը և 2017 թվականին ավելի բարձր աճի հավակնենք»,- ասաց նա:

Նախարարի խոսքով՝ ծախսերի կառուցվածքն ապագա տարիներին, գլոբալ առումով, պետք է փոխվի: «Ընթացիկ ծախսերի մասով` կամաց-կամաց գոտիները պետք է ձգել»,- նշեց Արամյանը: