ՄԱԿ-ը կոչ է արել վերսկսել Լեռնային Ղարաբաղի հարցով բանակցությունները

ՄԱԿ-ի գլխավոր քարտուղարի խոսնակի տեղակալը հայտարարություն է տարածել Լեռնային Ղարաբաղում դրության սրման վերաբերյալ:

ՄԱԿ-ի պաշտոնական կայքից տեղեկանում ենք, որ ՄԱԿ-ը կիսել է ԵԱՀԿ Մինսկի խմբի համանախագահների հայտնած մտահոգությունը զինադադարի վերջին խախտումների վերաբերյալ:

«Մենք նույնպես կիսում ենք համանախագահների մտահոգությունը զինադադարի վերջին խախտումների վերաբերյալ, որոնց հետևանքով շփման գծում ողբերգական կորուստներ եղան: Մենք կրկնում ենք  իրավիճակը լարելուց զերծ մնալու և լարվածության նվազմանը ուղղված միջոցներ ձեռնարկելու՝ համանախագահների` կողմերին ուղղված կոչը»,- նշվել է հայտարարության մեջ։

Նաև ասվել է, որ ՄԱԿ-ը կոչ է անում կողմերին` վերսկսել առարկայական բանակցություններ՝ դրսևորելով քաղաքական կամք։

«ՄԱԿ-ն իր հերթին պատրաստ է այդ հարցում անհրաժեշտ յուրաքանչյուր քայլ ցուցաբերել»,- ասվել է հայտարարության մեջ: