Հարաբերությունները կարգավորվում են փաստաթղթերով, ոչ թե որևէ դեսպանի ցանկությամբ. Սամվել Ֆարմանյան

Եթե Հայաստանում Եվրամիության ներկայությունն այլևս ցանկալի չէ, մենք այն չենք պարտադրի. այսօր լրագրողներին ասել է Հայաստանում ԵՄ պատվիրակության ղեկավար, դեսպան Պյոտր Սվիտալսկին, երբ լրագրողները նրան հարց են ուղղել` կապված արդարադատության նախարար Դավիթ Հարությունյանի և Տիգրան Մուկուչյանի հայտարարությունների հետ:

ԱԺ եվրոպական ինտեգրման հարցերի մշտական հանձնաժողովի անդամ, ՀՀԿ խմբակցության պատգամավոր Սամվել Ֆարմանյանը Yerkir.am-ի հետ զրույցում նշեց, որ ՀՀ-ի և ԵՄ-ի միջև հարաբերությունները կարգավորվում են իրավապայմանագրային հիմքով:

«Մենք հիմա ԵՄ-ի հետ բանակցությունների վճռորոշ փուլում ենք, նախաստորագրման փուլում ենք, սպասում ենք այդ փաստաթղթի ստորագրմանը: Երկու միջազգային սուբյեկտների միջև հարաբերությունները կարգավորվում են նրանց միջև կնքված փաստաթղթերով և ոչ թե, առանձին վերցված, որևէ դեսպանի` ՀՀ-ի, ԵՄ-ի դեսպանի, որևէ դիվանագետի կամ նույնիսկ որևէ քաղաքական պաշտոնյայի ցանկությամբ»,- ընդգծեց Ֆարմանյանը:

Նա նշեց, որ ԵՄ-ն ՀՀ առաջնահերթ գործընկերներից մեկն է: «ԵՄ-ի հետ պայմանագրային հիմքով համագործակցության խորացումը մեր արտաքին քաղաքականության առաջնահերթություններից է: ՀՀ-ն այսուհետ էլ մտադիր է շարունակել ԵՄ-ի հետ համագործակցության խորացումը, և դա կողք կողքի է քայլում մեր երկրում բարեփոխումների օրակարգի հետ»,- ասաց պատգամավորը:

Ֆարմանյանն ընդգծեց, որ ԵՄ-ն Հայաստանին տարատեսակ աջակցություններ է ցուցաբերել և այդ աջակցությունը կենսունակ ու մեծ նշանակություն է ունեցել մեր երկրում բարեփոխումների առաջմղման հարցում, ինչի համար էլ երախտապարտ ենք ԵՄ-ին: «Վերջին լավագույն օրինակը ընտրակարգի հետ է կապված, որտեղ ԵՄ-ի ֆինանսական աջակցության շնորհիվ հնարավոր եղավ առաջ տանել ընտրական պրոցեսների որակը մեր երկրում»,- ասաց նա:

Ֆարմանյանի կարծիքով` վերջին հայտարարություններին լրացուցիչ դրամատիզմ հաղորդելու կարիք չկա:  «Ամեն ինչ շատ պարզ է և հասկանալի բոլոր կողմերի համար:  Մի կողմից` մենք` որպես պետություն, շատ բարձր ենք գնահատում ԵՄ-ի հետ  մեր հարաբերությունների որակը, երախտապարտ ենք մինչ օրս մեր երկրում բարեփոխումների և այլ հարցերի ցուցաբերած աջակցության համար, մյուս կողմից` կան հարցեր, որոնք սահմանադրորեն մեր պետության, ինքնիշխան պետական մարմինների գործառույթների տիրույթում են: Մենք նաև բարձր ենք գնահատում մեր բոլոր գործընկերների շահագրգիռ մտահոգությունները` կապված մեր երկրում  այս կամ այն խնդրի լուծման վերաբերյալ»,- հայտարարեց նա, ապա հավելեց.  «Միևնույն ժամանակ, որպես պետություն, երբ գնահատականներ են հնչեցվում այս կամ այն երևույթի, կառուցակարգի գործընթացների մասին, միշտ նպատակային և ավելի օգտակար է լսել համակողմանի գնահատական, մանավանդ, երբ դա վերաբերում է ընտրությունների կազմակերպմանն ու անցկացմանը»:

Հիշեցնենք, որ Հայաստանում ԵՄ պատվիրակության ղեկավար, դեսպան Պյոտր Սվիտալսկին  շեշտել էր, որ ԿԸՀ-ն արժանահավատ կառույց չէ, և որ հարկավոր է նրա կազմը համալրել քաղաքացիական հասարակության ներկայացուցիչներով, ինչին հետևել էր ՀՀ արդարադատության նախարար Դավիթ Հարությունյանի պատասխանը` պարոն Սվիտալսկու հայտարարությունը  ներքին քաղաքական հարցերին միջամտելու որոշակի փորձ է: