Ես հավատում եմ Տարոն Մարգարյանին. Երվանդ Զախարյան

Լրագրողները նախկին քաղաքապետ Երվանդ Զախարյանից հետաքրքվեցին` ինչպե՞ս է վերաբերվում Տարոն Մարգարյանի աշխատանքին, և որո՞նք են Երևանի խնդիրները:

Ըստ Զախարյանի` փոփոխություններ արդեն իսկ կան:  «Ես ուրախ եմ, որ Տարոն Մարգարյանը վերընտրվել է Երևանի քաղաքապետ, որովհետև ավելի շատ, քան Տարոն Մարգարյանը, ոչ ոք չի տիրապետում իրավիճակին և չգիտի քաղաքի հոգսերը ավելի լավ, քան Տարոն Մարգարյանը»,- հայտարարեց նա:

Զախարյանը համոզմունք հայտնեց, որ նորընտիր ավագանու հետ Մարգարյանը կանի ամեն ինչ, որպեսզի երևանցիներին հուզող հարցերը և Երևան քաղաքի խնդիրները ստանան համապատասխան լուծումներ: «Ես հավատում եմ Տարոն Մարգարյանին»,- ասաց նա:

Ինչ վերաբերում է հարցին` ի՞նչ է բարեփոխվել հիմա Երևանում, որ նրա օրոք չէր եղել, Զախարյանն արձագանքեց. «Քաղաքն ավելի գեղեցիկ ու բարեկարգ է, քան նախկինում, բայց առաջին խնդիրը, որ կա և պետք է լուծվի  ստորգետնյա կոմունիկացիաների, ճանապարհների և տրանսպորտի խնդիրներն են»:

Սակայն նա դա Մարգարյանի  բացթողումը չհամարեց: «Բավականին աշխատանքներ կատարվում են, և իմ ցանկությունն  ու առաջարկությունը կլինի, որպեսզի դրանք լինեն նոր ավագանու կարևորագույն հարցերից մեկը»,- ասաց Զախարյանը: