Ապրիլյան պատերազմի հերոս Անդրանիկ Զոհրաբյանի ծննդյան օրն է

«Այսօր ինձ մնում է իմ մեծ կորստի վշտի ու տառապանքի մեջ ապրել, միևնույն ժամանակ` հպարտության զգացումով, որ որդիս իր զինակից ընկերների հետ պայքարել է արյան գնով ու ընկել հանուն հայրենիքի»,- ասել է Ատոմ Զոհրաբյանը` ապրիլյան քառօրյա պատերազմի ժամանակ զոհված Անդրանիկ Զոհրաբյանը հայրը:

Զոհրաբյանը Վեդի քաղաքից էր: 20 տարեկանը դեռ չբոլորած զինվորը մեկն էր կապիտան Արմենակ Ուրֆանյանի վաշտի այն երեք տղաներից, ովքեր չենթարկվեցին իրենց հրամանատարի հրամանին ու չնահանջեցին` մինչև վերջ պայքարելով իրենց դիրքի համար: 

Անդրանիկը դիտակետից դուրս է հանել ծանր զենքը և թմբի վրա կանգնած դեմ առ դեմ դիմավորել թշնամուն ու ոչնչացրել նրանց: Գնդացրորդ Անդրանիկն Արցախի հերոս Ռոբերտ Աբաջյանի հետ վիրավոր վիճակում էլ շարունակել է կռիվն ու արյունահոսելով մահացել: 

Անդրանիկ Զոհրաբյանը նախագահ Սերժ Սարգսյանի կողմից հետմահու պարգևատվել է «Մարտական խաչ» շքանշանով: