Շնորհակալություն եմ հայտնում իմ թանկագին կնոջը՝ տիկին Սեմիհային. Թուրքիայի վարչապետը «վերասիրահարվելով» ասմունքեց

Տեղեկացրել ենք, որ երեկ Թուրքիայում կայացավ սահմանադրական փոփոխությունների վերաբերյալ հանրաքվեն: Քվեաթերթիկների 99,45%-ի մշակման արդյունքներով` սահմանադրական բարեփոխումների օգտին քվեարկել է 51,37%-ը, դեմ` 48,63%-ը:

Թուրքիայի վարչապետ Բինալի Յըլդըրըմը հանրաքվեի արդյունքների հրապարակումից անմիջապես հետո ելույթով է հանդես եկել: Շնորհակալություն հայտնելով «Թուրքիայի ազիզ ժողովրդին»՝ նա ընդգծել է, որ կառավարության ուշադրության կենտրոնում հայտնվելիք հաջորդ հարցը 2019-ի ընտրություններն են:

Յըլըդրըմը նշել է, որ այս հանրաքվեի արդյունքները «լավագույն պատասխանն են հարցին, թե ո՞վ է կանգնած եղել 2016-ի հուլիսի 15-ի ռազմական հեղաշրջման փորձի հետևում»: 

Ելույթի ընթացքում շնորհավորանքների և շնորհակալությունների շարք հնչեցրած վարչապետը չի մոռացել նաև իր «սիրելի կնոջը»: «Շատ շնորհակալ եմ իմ սիրելի կնոջը՝ տիկին Սեմիհային և ընտանիքին, ովքեր այս երկար և դժվար քարոզարշավի ընթացքում եղան իմ կողքին և աջակցեցին ինձ»,- հայտարարել է նա` ելույթի վերջում ասմունքելով հանրաքվեի երգի բառերը: