Մերկելը և Օլանդը Սիրիայում ստեղծված իրավիճակի համար մեղադրել են Ասադին

Գերմանիայի կանցլեր Անգելա Մերկելը և Ֆրանսիայի նախագահ Ֆրանսուա Օլանդը հայտարարել են, որ Սիրիայում ստեղծված իրավիճակի պատասխանատուն երկրի նախագահ Բաշար Ասադն է. հայտնում է РИА Новости-ն:

«Նախագահ Ասադը նման զարգացման միակ պատասխանատուն է: Իր կողմից քիմիական զենքի կրկնակի կիրառումը և սեփական բնակչության դեմ հանցագործությունը պահանջում է պատժամիջոցների սահմանում, ինչը պահանջել էին Գերմանիան և Ֆրանսիան 2013-ին Գուտայում տեղի ունեցած ողբերգությունից հետո»,-ասված է հայտարարությունում:

ԱՄՆ-ն երեկ թևավոր հրթիռներով հարվածել է Սիրիայի արևմտյան Հոմս նահանգում գտնվող կառավարական ուժերի ռազմաբազային:

ԱՄՆ նախագահ Դոնալդ Թրամփը հայտարարել է, որ դա բխում էր ԱՄՆ ազգային անվտանգության կենսական շահերից: Հարվածի թիրախը Շայրաթ ռազմաբազան էր, որտեղից, ամերիկյան իշխանությունների կարծիքով, իրականացվել են քիմիական հարձակումները: