Ազնավուրի հարցազրույցը մտահոգ մարդու անկեղծ խոսք էր

ՀՀԿ-ական պատգամավոր Լեռնիկ Ալեքսանյանը Շառլ Ազնավուրի հարցազրույցը շատ անկեղծ, պետության խնդիրներով մտահոգ մարդու խոսք է համարում:

«Այդքան ամագ ունեցող մարդն իրավունք ուներ էդ տիպի հարցազրույց տալ, որքան էլ դա քաղաքական շահարկումների առիթ տա: Դա մտահոգ մարդու անկեղծ ու իր երգերի նման զուլալ խոսք էր, եւ դրա իրավունքն այս պահին շատ քիչ մարդ կարող է ունենալ»,- ասաց նա` հավելելով, որ թեեւ դա քաղաքական շահարկումների առիթ է տալիս, սակայն Ազնավուրը քաղաքական շահագրգռվածություն չունի:

ԼՂՀ նախկին արտգործնախարար Արման Մելիքյանն էլ կարծում է, որ հարցազրույցը մտավորական Ազնավուրն է տվել, այլ ոչ  թե դեսպանը: Մելիքյանի խոսքերով` Ազնավուրի հարցազրույցի` Ցեղասպանության մասին հատվածն ուղղված էր Սփյուռքին, իսկ երկրորդ` Հայաստանին վերաբերող հատվածից պետք է լուրջ հետեւություններ անել: «Ազնավուրի ասածը բարձր եմ գնահատում, քանի որ դա մտահոգ մարդու խոսք էր: Նա կարող է սեղմել իշխանության ձեռքը և միաժամանակ ասել այն, ինչ մտածում է նույն այդ իշխանության մասին»,- ասաց Արման Մելիքյանը: