Կարծում եմ` Նիկոլն ունի ներողություն խնդրելու խիզախությունը. Աշոտյան

Քաղաքական մթնոլորտը, որ ձևավորվել է երկրում, մրցակցային քարոզարշավ է, որը թույլ է տալիս ապրիլի 2-ին կատարել գիտակցված ընտրություն. լրագրողների հետ զրույցում կարծիք հայտնեց ՀՀԿ փոխնախագահ Արմեն Աշոտյանը:

Ըստ նրա` ընտրարշավը հանգիստ է անցնում, հասարակության ներսում բևեռացման գործընթաց տեղի չի ունեցել: «Միայն երկու գործիչ են, որ անցնում են բարեկրթության սահմանները: Չգիտեմ` զուգադիպությո՞ւն է, թե՞ պատահականություն, բայց երկուսն էլ նույն թերթում են աշխատել ժամանակին: Եթե մեկն անհույս է, ապա Նիկոլ Փաշինյանին պետք է հորդորեմ երեկվա հայտարարությունից հետո ներողություն խնդրել այն մարդկանցից, ում պիտակավորել է բավականին անբարոյական ձևով: Կարծում եմ` Նիկոլն ունի այդ խիզախությունը` «տաք-տաք» ասած բառերի համար ներողություն խնդրելու: Եթե ինքն էլ չխնդրի, կհորդորեմ «Ելք»-ի ավելի հմուտ և իմաստուն ներկայացուցիչներին` նրա անունից ներողություն խնդրել»,- ասաց Աշոտյանը:

Հիշեցնենք, որ երեկ «Ելք»-ի առաջնորդներից Նիկոլ Փաշինյանը, անդրադառնալով  114 դպրոցներում և մանկապարտեզներում վարչական ռեսուրսները հօգուտ  ՀՀԿ-ի չարաշահելուն, ասել է. «ՀՀԿ-ն ասում է, որ ցուցակներ հավաքելը օրինական է: Եթե զուտ այդ հարթության մեջ նայենք` ուրեմն Երևանյան լճի մոտ կանգնող պոռնիկների գործն էլ օրինական է»: