Համայնքների ղեկավարները պետք է կրթվեն. նոր հանձնարարական

Այսօր` կառավարության նիստի օրակարգին անցնելուց առաջ, վարչապետ Կարեն Կարապետյանը հանձնարարական տվեց համայնքների զարգացման հնգամյա ծրագրի վերաբերյալ: 2016-ի դեկտեմբերին համայնքների ղեկավարներին տրվեց համայնքների զարգացման հնգամյա ծրագրի նոր մեթոդաբանության վերաբերյալ հանձնարարական: Արդեն ստացվել են 923 համայնքների զարգացման ծրագրերը, ինչպես նաև բնակիչների հետ հանդիպումները ցույց են տվել, որ համայնքների ղեկավարներն այդ ծրագրերը ոչ լիարժեք են քննարկել բնակիչների հետ:

«Արձանագրվել են դեպքեր, երբ համայնքների բնակիչները տեղյակ չեն եղել այդ ծրագրերի մասին: Հանձնարարում եմ տարածքային կառավարման և զարգացման նախարարին ու մարզպետներին` մեկամսյա ժամկետում կազմակերպել համապատասխան ծրագրերի վերանայման գործընթաց` լիարժեք ներառելով համայնքի բնակիչներին այդ ծրագրերի քննարկումներին»,- ասաց վարչապետը:

Տարածքային կառավարման և զարգացման նախարարին հանձնարարվեց եռաշաբաթ ժամկետում ընտրել համայնքների հնգամյա զարգացման լավագույն ծրագրերը և դրանց վերաբերյալ կազմակերպել քննարկում կառավարության աշխատակազմի հետ:

Մեկնաբանելով այդ հանձնարարականը` Կարեն Կարապետյանը նշեց. «Բազմաթիվ մեր քաղաքացիները բարձրացնում են ոչ լոկալ, ոչ անձնական խնդիրներ, որոնք, պարզվում է, տեղ չեն գտել համայնքների զարգացման ծրագրում: Այնինչ` համայնքի ղեկավարը բոլոր մակրոխնդիրները` աշխատանքի, զբաղվածության, ենթակառուցվածքների և այլնի վերաբերյալ պետք է ներկայացնի: Պարո'ն Տերտերյան, հստակ հետևեք այս հանձնարարականի կատարմանը: Այն վերլուծական կենտրոնը, որ ստեղծել ենք, արդեն մեզ պետք է տար տեղեկություններ տարածքների անհամաչափ զարգացման մասին, որը պետք է ուղեցույց լինի մարզպետների համար»:

Ըստ նրա` գերմանական կառավարության մի ծրագրով պետք է կազմակերպել բոլոր համայնքների ղեկավարների ուսուցման ծրագրեր, Ամերիկյան համալսարանի  հետ համագործակցել ու համապատասխան դասընթացներ կազմակերպել մարզպետների համար` ռեգիոնալ կառավարման վերաբերյալ: