Ջրառատում տեղի ունեցած միջադեպի հետևանքով վիրավորվածներն ազգականներ են. մանրամասներ

Yerkir.am-ի տեղեկություններով՝ Ջրառատում տեղի ունեցած միջադեպի հետևանքով վիրավորվածներն ազգականներ են` 17-ամյա Արայիկ Մելքոնյանը, նրա հայրը՝ Մելիք Մելքոնյանը, և հորեղբորորդին՝ 27-ամյա Հակոբ Մելքոնյանը:

Yerkir.am-ին «Էրեբունի» ԲԿ-ի գործադիր տնօրեն Միքայել Մանուկյանը հայտնեց, որ Արայիկ Մելքոնյանը նախաբազկի կոտրվածք ունի, Հակոբ Մելքոնյանը՝ ձախ ոտնաթաթի հրազենային թափանցող վնասվածք, ինչպես նաև ձախ քունքային շրջանում պատռվածք, իսկ Մելիք Մելքոնյանը` աջ ու ձախ նստատեղերի կտրած-ծակած վերք: Ըստ նրա` տուժածների վիճակը կայուն է:

Yerkir.am-ի տեղեկություններով՝ 17-ամյա Արայիկ Մելքոնյանը սովորում է Ջրառատի միջնակարգ դպրոցի 11-րդ դասարանում:

Նշենք, որ ոստիկանությունը լրատվամիջոցներին հայտնել է, որ, ըստ նախնական տեղեկությունների, վիճաբանությունը սկսվել է դպրոցում. աշակերտների միջև վեճին միջամտել են մեծահասակները։

Ավելի վաղ հայտնել ենք, որ ՀՀ փոխոստիկանապետ Լևոն Երանոսյանի հայրենի Ջրառատ գյուղում այսօր զինված միջադեպ է տեղի ունեցել: Նախնական տեղեկություններով՝ կրակել են գյուղի երիտասարդներից Հակոբ Մելքոնյանի վրա, իսկ նրա հորեղբորը՝ դանակահարել: Շրջանառվող տեղեկությունների համաձայն՝ կրակել է Ջրառատ համայնքի ղեկավար Սամվել Գալստյանի եղբայրը: Նա ՀՀ փոխոստիկանապետ Լևոն Երանոսյանի ազգականն է: