Ջրառատում տեղի ունեցած միջադեպի գործով 6 անձ ազատ է արձակվել

Երեկ Արմավիրի մարզի Ջրառատ գյուղում տեղի ունեցած միջադեպի փաստով նախապատրաստված նյութերը ոստիկանությունն ուղարկել է ՀՀ քննչական կոմիտե: Այս մասին Yerkir.am-ին հայտնեցին ոստիկանությունից:

Yerkir.am-ի հետ զրույցում ՀՀ քննչական կոմիտեի նախագահի խորհրդական Սոնա Տռուզյանը հայտնեց, որ միջադեպից հետո 5 անձ բերման է ենթարկվել ոստիկանություն, իսկ ևս մեկը կամավոր է ներկայացել: Նրա խոսքով՝ 6-ն էլ ազատ են արձակվել: «Իրականացվում են անհրաժեշտ դատավարական միջոցառումներ դեպքի հիմնական հանգամանքները պարզելու ուղղությամբ»,-հայտնեց նա:

Հիշեցնենք, որ երեկ ՕՐՕ դաշինքը հայտարարություն էր տարածել, որում ասված էր. «Այսօր կեսօրին Արմավիրի մարզի Ջրառատ գյուղում առավոտյան «Օհանյան-Րաֆֆի-Օսկանյան» դաշինքի անցկացրած հաջող քարոզարշավից եւ գյուղացիների ջերմ ընդունելությունից, թերեւս, սրտնեղած՝ նույն գյուղի գյուղապետ, ՀՀԿ ներկայացուցիչ Սամվել Գալստյանի (սույն գյուղապետը ոչ անհայտ փոխոստիկանապետ Լեւոն Երանոսյանի բարեկամն է, իսկ գյուղն էլ՝ նույն Երանոսյանի ծննդավայրն է) կողմից սպառնալիքներ է հնչեցվել գյուղի բնակչի, «Օհանյան-Րաֆֆի-Օսկանյան» դաշինքի համակրի հանդեպ։

Ընդ որում՝ գյուղապետի շրջապատը ներկայացնող անձանցից մեկը դաշինքի կողմնակցի վրա ատրճանակ է ուղղել։ Ատրճանակը «Օհանյան-Րաֆֆի-Օսկանյան» դաշինքի կողմնակիցները խլել են նրա ձեռքից եւ վնասազերծել օրինախախտին: Ուշագրավն այն է, որ ատրճանակով սպառնացող սուբյեկտին կարգի հրավիրելու փոխարեն իրավապահ մարմինների ներկայացուցիչները ոստիկանության Էջմիածնի բաժին են բերման ենթարկել «Օհանյան-Րաֆֆի-Օսկանյան» դաշինքի համակիրներին»: