Մի քանի վարորդներ կարող են դժգոհել, բայց մենք պետք է ժողովրդին պատշաճ սպասարկենք. տրանսպորտի վարչության պետ

Այսօր առավոտից 39 համարի ավտոբուսի վարորդները գործադուլ են հայտարարել: Պատճառը 12 համարի ավտոբուսն է, որը սկսել է նույն երթուղով աշխատել:  Բանն այն է, որ վարորդները մտահոգություն են հայտնում, թե այդ կերպ միմյանց կխանգարեն:

Երևանի քաղաքապետարանի տրանսպորտի վարչության պետ Հենրիկ Նավասարդյանը Yerkir.am-ին տեղեկացրեց, որ այժմ արդեն աշխատանքներ են տարվում խնդիրը լուծելու ուղղությամբ: «Սպասարկող ընկերության հետ պետք է հանդիպում ունենանք և հասկանանք՝ ինչպես ենք խնդիրը լուծելու»,- ասաց նա, ապա հավելեց, որ 12 համարի երթուղին սպասարկում է երկու վարչական շրջանների բնակիչների: «Մի քանի վարորդներ կարող են դժգոհել, բայց մենք պետք է այնպես անենք, որ ժողովրդին կարողանանք պատշաճ սպասարկել»,- նշեց Նավասարդյանը:

Ի դեպ, Երևանի քաղաքապետարանը 39 համարի ավտոբուսի չաշխատելու հետ կապված նախապես հայտարարություն չի տարածել, ինչի հետևանքով բնակիչները տհաճ անակնկալի առաջ են կանգնել: