Լևոն Արոնյանը կմասնակցի Grand Chess Tour-ի մրցաշարերին

Հայտնի են դարձել Grand Chess Tour մրցաշարերի մասնակիցների անունները` Լևոն Արոնյան, Մագնուս Կարլսեն, Ֆաբիանո Կարուանա, Սերգեյ Կարյակին, Ուեսլի Սո, Հիկարու Նակամուրա, Մաքսիմ Վաշիե-Լագրավ, Վիշվանաթան Անանդ և Յան Նեպոմնյաշչի:

Լևոն Արոնյանը իրավունք ստացավ մասնակցելու մրցաշարին այն բանից հետո, երբ Վլադիմիր Կրամնիկը հրաժարվեց իր մասնակցությունից:

Chess.com կայքին տրված հարցազրույցում Վլադիմիր Կրամնիկը նշել էր, որ հրաժարվում է մասնակցել Grand Chess Tour-ին: «Սա միայն ժամանակացույցի հետ կապված խնդիր է: Ես արդեն ունեմ պարտավորություններ ամռանն ու աշնանը մրցաշարերի մասնակցելու համար և եթե ես  մասնակցեի Grand Chess Tour-ին, ապա կստացվեր, որ ես 4 ամիս, գրեթե առանց հանգստի, պետք է շախմատ խաղայի: Դա չափից շատ է»,- մասնավորապես ասել է Կրամնիկը:

Grand Chess Tour-ը բաղկացած է 5 մրցաշարից` արագ շախմատի 3 մրցաշար և դասական 2 մրցաշար: Վերը նշված 9 շախմատիստները պարտադիր պետք է մասնակցեն դասական շախմատի մրցաշարերին` Սինգֆիլդի գավաթին և Լոնդոն Չեսս Կլասիկ մրցաշարին, ինչպես նաև 2 արագ շախմատի մրցաշարերի: