Մենք ընդունել ենք անգամ հայերի, որոնց նայում ենք որպես մարդու. Թուրքիայի վարչապետի օգնականի սկանդալային հայտարարությունը

Թուրքիայի վարչապետի օգնական Վեյսի Քայնաքը «Անադոլու» գործակալության հետ զրույցում անդրադարձել է ԱՄՆ նախագահ Դոնալդ Թրամփի՝ ներգաղթյալների վերաբերյալ աղմկահարույց հրամանագրին:

Ըստ Marasgundem-ի՝ Քայնաքը այդ թեմայի մասին խոսելիս կրկնել է թուրքական իշխանությունների անգիրը, թե Թուրքիան ընդունել է 3 միլիոն փախստականի, այդ թվում՝ հայերի:

Նա նաև սկանդալային հայտարարություն է արել, թե Թուրքիայի կողմից ընդունված բոլոր փախստականներն ընդունվում են որպես «մարդ»:

«3 միլիոն փախստականների մեծ մասը Սիրիայից են, սակայն կան նաև պաղեստինցիներ, իրաքցիներ, աֆղանցիներ, անգամ՝ հայեր: Մենք նրանց բոլորին նայում ենք միայն որպես մարդու»,- հայտարարել է Քայնաքը՝ նշելով, որ «իրենց մշակույթն ու պատմական արմատները դա են թելադրում անել»:

Նա նաև մեղադրել է Գերմանիային ահաբեկչական խմբավորումներին աջակցելու մեջ: «Մենք գիտենք, որ մի շարք ԵՄ երկրներ, այդ թվում՝ Գերմանիան, աջակցում են ահաբեկչությանը: Հունաստանը մեզ չի վերադարձնում ահաբեկական խմբավորման անդամներին: Մենք լավ գիտենք նրանց աջակցողներին: Տեսնում ենք նաև, թե ինչպես են Սիրիայում «Եփրատի վահան» մեր գործողությանն աջակցելու փոխարեն աջակցում PYD-Ին և մյուս ահաբեկչական խմբավորումներին: Երկերես վերաբերմունքով ահաբեկչության դեմը չեն առնում»,- հայտարարել է Քայնաքը: