Ռուսական պատվիրակության լիազորությունները չեն վերականգնվի հունվարին. ԵԽԽՎ ղեկավար

ԵԽԽՎ ղեկավար Պեդրո Ագրամունտը հայտարարել է, որ ԵԽԽՎ-ում ռուսական պատվիրակության լիազորությունները, ամենայն հավանականությամբ, չեն վերականգնվի հունվարին, հայտնում է «ՌԻԱ Նովոստի»-ն:

«Մենք բավական երկար և կառուցողական հանդիպում ենք ունեցել: Ցավոք, ԵԽԽՎ-ում ՌԴ պատվիրակության մասնակցության հետ կապված իրավիճակը բարդ է: Ամենայն հավանականությամբ, ամսվա վերջում ռուսական պատվիրակության լիազորությունները չեն վերականգնվի»,- ասել է Ագրամունտը ՌԴ պետդումայի խոսնակ Վյաչեսլավ Վոլոդինի հետ հանդիպման արդյունքներով:

Ագրամունտը նշել է, որ կցանկանար, որ «այլ կերպ լիներ, բայց մենք մտադիր ենք շարունակել զարգացնել երկխոսությունը և համագործակցությունը»: Նա նաև հույս է հայտնել, որ ՌԴ պատվիրակության մասնակցության հետ կապված խնդիրը լուծել կարելի կլինի «հնարավորինս շուտ» և խոստացել է դրա համար ներդնել բոլոր ջանքերը: