Կառավարությունն ազգաբնակչության սպառած էլեկտրաէներգիայի թանկացած մասը կսուբսիդավորի միայն երկու ամիս

Այսօր կառավարության նիստին օրակարգին անցնելուց առաջ վարչապետ Հովիկ Աբրահամյանն անդրադարձավ էլեկտրաէներգիայի փոխհատուցման խնդրին: Ըստ նրա` քանի որ կառավարությունը մինչև սեպտեմբերի վերջը փոխհատուցելու է ազգաբնակչության և ՓՄՁ ծախսած էլեկտրաէներգիայի` բարձրացված սակագնով մասը, ուստի կցանկանար էներգետիկայի ու բնական պաշարների նախարարից ճշգրտումներ լսել փոխհատուցման վերաբերյալ:

Նախարար Երվանդ Զախարյանը պատասխանեց. «Աշխատանքներ են ընթանում ազգաբնակչության ու ՓՄՁ փոխհատուցման ծավալների ճշգրտման վերաբերյալ, դրանք ճշգրտվում են ՀԷՑ-ի հետ: Մինչև շաբաթվա վերջը հայտնի կլինեն այդ հաշվարկները, և փոխհատուցումները կվճարվեն մյուս շաբաթվա ընթացքում, այսինքն` մինչև ամիս 20-ը վճարումները կլինեն»:

Վարչապետը հավելեց, որ այդ փոխհատուցման ու վճարումների վերաբերյալ ազգաբնակչությանը պետք է մանրամասն տեղեկացնել, որովհետև թյուր տեղեկություններ են տարածվում, իբր որևէ բան չի արվում, աշխատանք չի տարվում այդ ուղղությամբ: «Կառավարությունը այն, ինչ հանձն է առել, կատարում է ժամկետներում ու ըստ պատասխանատվության: Դրա մասին հանրությունը պետք է տեղյակ լինի»,- ասաց Հովիկ Աբրահամյանը: