Լիտվայում խախտվել է գնացքների երթևեկությունը

Լիտվայում ներքին հաղորդակցության երթուղիներով ընթացող գնացքների երթևեկությունը խախտվել է եղանակային պայմանների պատճառով: Այդ մասին լրագրողներին հայտնել է «Լիտվայի երկաթուղային գծեր» ձեռնարկության ներկայացուցիչ Պաուլյուս Վիչկաչկան, գրում է ТАСС-ը:

«Ջերմաստիճանի կտրուկ տատանումը բացասական ազդեցություն է թողել երկաթուղային գծերի տեխնիկական վիճակի վրա, ինչը բերել է գնացքների ուշացումների»,- բացատրել է նա:

Երկաթուղային ընկերության տվյալներով՝ ներքին հաղորդակցության մի շարք ուղղություններով անհրաժեշտ է եղել հետաձգել մի քանի գնացք և նվազեցնել երթևեկության թույլատրելի արագությունը: Արդյունքում նշանակման կայարան նրանք ժամանել են մեկ ժամ ուշացումով:

Նշվում է, որ դեռ չորեքշաբթի Լիտվայում մոտ զրո աստիճան է եղել: Հինգշաբթի մի քանի ժամվա ընթացքում ջերմաստիճանը կտրուկ նվազել է մինչև -10 աստիճան և ավելի ցածր: Հունվարի 6-ին երկրում ջերմաստիճանը մոտեցել է -20 աստիճանի: