Հիմնադրամը շահույթ հետապնդող չէ, բայց շահույթ կարող է ունենալ. պաշտպանության նախարար

Այսօր ԱԺ արտահերթ նիստում քննարկվում է ՀՀ պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին օրենքի նախագիծը երկրորդ ընթերցմամբ ընդունելու հարցը: Ըստ օրինագծի` յուրաքանչյուր աշխատող քաղաքացի պետք է ամսական 1000 դրամ փոխանցի հիմնադրամին: Հիմնական զեկուցողն է պաշտպանության նախարար Վիգեն Սարգսյանը:

ԲՀԿ խմբակցության պատգամավոր Գուրգեն Արսենյանին հետաքրքրում էր, թե ինչո՞ւ են փորձում հիմնադրամը հանել շահութահարկից, եթե հիմնադրամը շահույթ չհետապնդող կազմակերպություն է և պետք է սոցիալական հարցեր լուծի:

«Այս հիմնադրամը, սովետական արտահայտությամբ ասած, դարձնում եք պետություն պետության մեջ: Արդյո՞ք սա ամենակարևոր հիմնադրամն է մեր պետականության մեջ»,- հարցրեց նա:

Վիգեն Սարգսյանը պատասխանեց. «Յուրաքանչյուր հիմնադրամ ունի իր կարևորությունը: Հիմնադրամը շահույթ հետապնդող չէ, բայց շահույթ կարող է ունենալ, որովհետև հիմնադրամը կարող է պարտատոմսեր ունենալ»:

Գուրգեն Արսենյանն արձագանքեց` ասելով, որ նախարարի հիմնավորումը համոզիչ չէ, ուստի պետք է հրավիրել մասնագետների ու այդ հարցը վերանայել:

Վիգեն Սարգսյանը համաձայնեց, որ պետք է մասնագետների հետ ևս մեկ անգամ խորհրդակցել: