Լրագրողներն են ստեղծում նման մթնոլորտ. Արթուր Գևորգյան

ՀՀԿ խմբակցության պատգամավոր Արթուր Գևորգյանը, խոսելով ՊՆ ստեղծվելիք հիմնադրամին 1000 դրամներ հատկացնելու մասին, նշեց, որ վստահության պակասը հարցի մյուս կողմն է:

«Ինչ վերաբերում է` արդյո՞ք պետք է, արդյո՞ք տեղին է այս հիմնադրամը, իհարկե, տեղին է: Ես կողմ եմ, բայց կարծում եմ, որ շատ ավելի ճիշտ կլիներ, եթե տոկոսային հարաբերությամբ լիներ: Քիչ աշխատավարձ ստացողը վճարեր քիչ, շատ աշխատավարձ ստացողը` շատ: Տրամաբանորեն այսպես ավելի ճիշտ կլինի»,- ասաց նա:

Պատգամավորը չհերքեց, որ կարող է նման առաջարկությամբ հանդես գալ:

Հարցին`  համաձա՞յն է տեսակետին, որ նախ բանակը թալանած գեներալների ունեցվածքը պետք է վերադարձվի բանակին, Գևորգյանն արձագանքեց. «Եթե գեներալը հարստացել է ոչ բանակի հաշվին, դա նորմալ է, իսկ եթե հարստացել է բանակի հաշվին, դրանով պարտավոր են և պետք է զբաղվեն պատկան մարմինները»:

Հարցին` ինչո՞ւ չեն զբաղվել, պատգամավորը պատասխանեց. «Իսկ ո՞վ ասաց, որ չեն զբաղվել, մենք բազմիցս տեսնում ենք, որ բանակի բարձրաստիճան պաշտոնյաները ենթարկվում են մի շարք պատասխանատվությունների»:

«Էլ ինչի՞ հաշվին կարող է հարստանալ գեներալը» հարցին, Գևորգյանը պատասխանեց. «Դա նրանցից պետք է հարցնել: Դուք եք ստեղծում հասարակության մեջ մի կարծիք, որ գեղեցիկը, հաջողակը, հարուստը դիտվում է վատ: Լրագրողներն են հիմնականում ստեղծում նման մթնոլորտ, և թացը չորից սկսում է չտարբերվել: Ես համաձայն եմ, որ երկրում կան մի շարք պաշտոնյաներ, որ հարստացել են ոչ ճիշտ ճանապարհով, դրանով թող զբաղվեն պատկան մարմինները: Բայց նորմալ է, երբ հասարակության մեջ լինեն հաջողակներ, հարուստ մարդիկ, և պետք չէ չարությամբ լցվել նրանց նկատմամբ»:

Դիտարկմանը` Դուք նշել էիք, որ ԱՄՆ-ում տները ձերը չեն, բայց փաստեր հրապարակվեցին, պատգամավորն արձագանքեց. «Ես ձեզ կարող եմ ցույց տալ փաստաթղթեր, որտեղ ոչ թե մեկ, երկու, այլ 30 անվանական գույք կա` Գևորգյան Արթուրի անունով: Միգուցե հուշեք այդ մարդկանց, որ գնան այդ հասցեներով, և պարզվի, որ Գևորգյան Արթուրը տունն է: Գիտե՞ք ինչ կա, ընտրությունները մոտենում են, այս ամենից ինչ-որ քաղաքական խարդավանքների հոտ է գալիս: Ես 20 տարի մեծ սպորտում եմ եղել, եթե կան մարդիկ, ովքեր նախանձում են ինձ, ես ցանկանում եմ իմ անցած ճանապարհով իրենք անցնեն»:

Ըստ նրա` իրեն նախանձողները շատ են, բայց ինքը մեկնաբանություններ չի կարդում, իր խորհրդականներն են ասում դրանց մասին: «Հասարակությունը, երբ մեղադրում է ինձ, 1000 դրամներից է խոսում, միգուցե փորձի հետադարձ հայացք գցել և հասկանալ` ես ով եմ, ինչ ընտանիքից եմ և որտեղի՞ց եմ գալիս»,- ասաց պատգամավորը:

Գևորգյանը նշեց, որ շատ նորմալ կլիներ եթե ԱՄՆ-ում այդ ամենն իրենը լիներ, բայց իրենը չէ: «Ես 2 օլիմպիական խաղերի մասնակցած, մի շարք խոշոր մրցաշարերի մրցանակակիր բռնցքամարտիկ եմ եղել: Իմ առաջին պրոֆեսիոնալ կոնտրակտը 300 հազար ԱՄՆ դոլար է եղել 2001 թվականին: Շատ նորմալ կլիներ, եթե դրանք ինձ պատկանեին, բայց դա այդպես չէ»,- ասաց նա:

Ըստ պատգամավորի՝ ՀՀ-ում պետական պաշտոն զբաղեցնելուց հետո իր հայտարարագրած ունեցվածքը գնալով պակասել է: «Իմ գումարները գնալով նվազել են այն օրվանից, ինչ ես պաշտոնյա եմ եղել ՀՀ-ում: Ես գլխավորում եմ բռնցքամարտի ֆեդերացիան, և կամա, թե ակամա լուրջ ծախսեր են առաջանում բռնցքամարտը ճիշտ ուղու վրա դնելու համար, ֆինանսավորելու համար: Չնայած` ամբողջությամբ իմ հաշվին չէ, ես ունեմ մեծ կապեր: Մեկ-մեկ կարելի է նշել փաստեր, թե պատգամավորը իր հասարակական կյանքում, իր ընտրողների համար ինչ է անում»,- նշեց նա:

Ըստ Գևորգյանի՝ պատգամավորի պաշտոնն ամենևին էլ այս ամբիոնից ելույթ ունենալը չէ: «Դուք կարող եք գնալ իմ տարածք: Ես մեծամասնականով ընտրված պատգամավոր եմ, փորձեք շփվել ժողովրդի հետ և հարցումներ անել»,- ասաց նա:

Ինչ վերաբերում է իր՝ կրկին որպես պատգամավոր առաջադրվելուն, Գևորգյանը նշեց, որ ժամանակը ցույց կտա, ապա հավելեց, որ ինքը մեծամասնականով առաջադրված պատգամավոր է:

Դիտարկմանը՝ այլևս մեծամասնական ընտրակարգ չկա, նա պատասխանեց. «Երբ ուսումնասիրեք այդ համակարգը, կհասկանաք, որ ավելի շատ մեծամասնական է, քան համամասնական: Երբ ձեր անվան դիմաց են քվեարկում, դա ի՞նչ է, եթե ոչ` մեծամասնական: Քողարկված մեծամասնական համակարգ է»: