Աճեմյանցիները թատրոնի տնօրենի պաշտոնում կառաջադրեն իրենց թեկնածուին

Գյումրիի Վ. Աճեմյանի անվան պետական դրամատիկական թատրոնի տնօրենի ժամանակավոր պաշտոնակատար է նշանակվել Թատերական գործիչների միության նախագահ Հակոբ Ղազանչյանը:

Հիշեցնենք, որ սեպտեմբերի 14-ին թատրոնում պետք է տնօրենի ընտրություն լիներ. դիմել էին երկու ՀՀԿ-ական կանայք: Թատրոնի անձնակազմը դժգոհում էր, քանի որ իրենք տեղյակ չեն եղել, որ տնօրենի թափուր պաշտոնի համար արդեն մրցույթ է հայտարարվել: Մրցույթից մեկ օր առաջ առաջադրված կանանցից մեկը հետ վերցրեց իր գործերը:

Yerkir.am-ին թատրոնից տեղեկացրեցին, որ տնօրենի պաշտոնակատարը նշանակվել է երեք ամսով, և այս ընթացքում իրենք կառաջադրեն նաև իրենց թեկնածուին: Իսկ մինչ այդ թատրոնում պատրաստվում են նոր թատերաշրջանի բացմանը, որը կկայանա հոկտեմբերի սկզբին: