Միհրան Պողոսյանի օֆշորային գործարքների վերաբերյալ նյութերն ուղարկվել են դատախազություն

ՀՀ ԱՆ դատական ակտերի հարկադիր կատարման ծառայության` արդեն նախկին պետ Միհրան Պողոսյանի` Պանամայի օֆշորային գործարքների հետ կապված նյութերն ուսումնասիրվել են ՀՀ ոստիկանության կազմակերպված հանցավորության դեմ պայքարի գլխավոր վարչությունում: Yerkir.am-ի հետ զրույցում այս տեղեկությունը հաստատեց ՀՀ ոստիկանության հասարակայնության հետ կապերի և լրատվության վարչության պետ Աշոտ Ահարոնյանը: Նա հայտնեց, որ նյութերն ուղարկվել են ՀՀ գլխավոր դատախազություն` գործի հետագա ընթացքը լուծելու համար:

Հիշեցնենք, որ, համաձայն գաղտնազերծված փաստաթղթերի, ՀՀ նախկին գլխավոր հարկադիր կատարողը բաժնետեր է Պանամայում գրանցված երեք ընկերությունների: Օֆշորային սկանդալից հետո արդարադատության գեներալ-մայոր Միհրան Պողոսյանը ստիպված եղավ հրաժարական տալ` պատճառաբանելով, թե անընդունելի է համարում, որ իր անձը պատճառ դառնա մեր երկրի և բռնապետական Ադրբեջանի միջև քաղաքակրթական որևէ զուգահեռի, և անունն արծարծվի միլիարդավոր դոլարներ իրականում սեփականացրած՝ Ադրբեջանի նախագահ Իլհամ Ալիևի ընտանիքի կողքին։