Վարչապետի անձի ընտրության հարցում դեր է խաղացել վրացական մոդելը. Անուշ Սեդրակյան

«Ազատ դեմոկրատներ» կուսակցության փոխնախագահ Անուշ Սեդրակյանի կարծիքով՝ վարչապետի անձի ընտրության մեջ մեծ դեր է խաղացել վրացական մոդելը: Նա այսօր լրագրողների հետ զրույցում կարծիք հայտնեց, որ Հովիկ Աբրահամյանի հրաժարականը նախևառաջ պայմանավորված է նրանով, որ հստակ թվեր հնչեցվեցին տնտեսական աճի վերաբերյալ, բայց գրանցվեց տնտեսական անկում:

«Ինձ մոտ հարց է առաջանում, թե իրականում այս կառավարության փոփոխությունը ի՞նչ ներքին գործոններով է պայմանավորված: Եղավ աճող սոցիալական ընդվզում, եղան ղարաբաղյան ապրիլյան գործողությունները, «Սասնա ծռեր»-ի երևույթը: Այդ սոցիալական դժգոհության համար պետք էր գտնել պահապան շերտ, որպեսզի հասարակությունը բացահայտ հիասթափությունից անցնի սպասման գոտի»,- ասաց Սեդրակյանը: