Նոր նշանակում` օպերային թատրոնում

Ալ. Սպենդիարյանի անվան օպերայի և բալետի ազգային ակադեմիական թատրոնում նոր նշանակում է եղել` թատրոնի գեղարվեստական ղեկավար է նշանակվել օպերային երգիչ, թատրոնի նախկին գեղարվեստական ղեկավար Գեղամ Գրիգորյանը: Այս մասին yerkir.am-ին տեղեկացրեց թատրոնի փոխտնօրեն Հրաչ Գրիգորյանը:

Ըստ նրա` լավ է, որ վերջապես վերաբացվեց այդ հաստիքը, քանի որ յուրաքանչյուր թատրոն ունի գեղարվեստական ղեկավարի կարիք: «Ամենևին կապ չունի թատրոնի ուղղվածությունը` դրամատիկական, կամերային, բոլոր թատրոններն էլ ունեն գեղարվեստական ղեկավարի կարիք: Այն, որ այդ հաստիքը հանվել էր, բացթողում եմ համարում»,- ասաց Հրաչ Գրիգորյանը:

Նա նշեց նաև, որ Գեղամ Գրիգորյանին բոլորն էլ սպասում էին թատրոնում, քանի որ նա արդեն եղել է թատրոնի գեղարվեստական ղեկավար:

Ի դեպ, Գեղամ Գրիգորյանի հետ կաշխատի նրա օգնականը` Կարեն Շահինյանը, ով նույնպես «թատրոնի մարդն է»: