Պիոներպալատի մակարդակ է օպերային թատրոնում. Գեղամ Գրիգորյան

Տեղեկացրել էինք, որ Ալ. Սպենդիարյանի անվան օպերային թատրոնի գեղարվեստական ղեկավար է նշանակվել Գեղամ Գրիգորյանը, ով տարիներ առաջ թատրոնում նույն պաշտոնին էր:

Լրագրողների հետ զրույցում Գրիգորյանը նշեց, որ թատրոնում մի շարք անելիքներ կան: Ըստ նրա` պիոներպալատի մակարդակ է տիրում թատրոնում, և ինքը եկել է շտկելու բացը:

«Հեռացել էի, որովհետև չէի կարող դառնալ ողորմություն խնդրող, ես չեմ սիրում ողորմություն խնդրել, դրա փոխարեն ես կարողանում եմ լավ աշխատել: Թե ինչքանո՞վ տուժեց թատրոնն իմ բացակայության ժամանակ, չեմ ուզում մեկնաբանել, բայց ուզում եմ նշել, որ երիտասարդների մի մեծ բանակ անուշադրության մատնվեց: Ուզում եմ հպարտանալ իմ թատրոնով»,- ասաց նա:

Գրիգորյանը նշեց, որ վերջերս կոնսերվատորիայում ավարտական քննությունների նախագահն է եղել և կարող է հավաստիացնել, որ երիտասարդների շատ լավ բանակ ունենք, որոնց հարկավոր է համապատասխան աշխատանք տալ:

Խոսելով առաջիկա անելիքների մասին` նա հայտնեց, որ տարեկան ամենաքիչը  4-5 ներկայացում պետք է ավելացնել երիտասարդների համար, թատրոնը պետք է կոնսերվատորիայի հետ համագործակցություն սկսի` իր «ռեզերվը» ձեռք բերելով:

«Շատ բան չեմ կարող ասել, քանի որ դեռ պետք է ուսումնասիրեմ` ինչ ունեմ ձեռքիս տակ: Շատ շուտով հանձնարարություններ կտամ, որպեսզի տեսնեմ` ով ոնց է աշխատում և ինչքանով է նվիրված թատրոնին: Իսկ կադրային փոփոխությունների մասին այդ ամենից հետո նոր կմտածենք: Կաշխատեմ, որ լավ լինի ամեն ինչ»,- ասաց Գրիգորյանը:

Նա նշեց, որ պետք է նաև բյուջեն ուսումնասիրի, որպեսզի հասկանա, թե ինչ հնարավորություններ ունի: «Պետք է մեր յորղանի գյորա ոտներս մեկնենք, ոչ մեկին զարմացնելու տեղ չունենք»,- ասաց թատրոնի գեղարվեստական ղեկավարը: