Ներողություն և փոխհատուցում. Կրեմլը` Էրդողանին

Ռուսաստանը Թուրքիայից ներողություն է սպասում, նաև` խոցված Սու-24 ինքնաթիռի համար ու զոհված օդաչուի ընտանիքին փոխհատուցում. ըստ РИА Новости-ի` ասել է ՌԴ նախագահի մամուլի քարտուղար Դմիտրի Պեսկովը` մեկնաբանելով Թուրքիայի նախագահ Էրդողանի` Ռուսաստանի հետ երկխոսությունը վերականգնելու ուղղությամբ քայլեր անելու մասին խոսքերը:

Հիշեցնենք, որ Էրդողանն ասել էր, թե Թուրքիան ցանկանում է վերականգնել հարաբերությունները Ռուսաստանի հետ, սակայն չի հասկանում` ի՞նչ քայլ է իրենցից սպասում ռուսական կողմը:

Պեսկովը նշել է, որ այլ երկրի նախագահի խորհուրդ տալու իրավունք իրեն չի վերապահում, սակայն կարող է հիշեցնել ՌԴ նախագահի խոսքերը, նաև` ՌԴ-ի հայտարարություններն ու մեկնաբանությունները, որոնք արվել են տարբեր մակարդակներում:

«Նախագահը մեր օդաչուի սպանությունից բառացիորեն մի քանի օր անց ասել է, որ նման ագրեսիվ և դավաճան գործողություններից հետո, բնականաբար, ռուսական կողմը սպասում է ներողություն, կատարվածի պատճառների մասին բացատրություն և փոխհատուցում` ինչպես ինքնաթիռի համար, այնպես էլ` զոհված օդաչուի ընտանիքին: Դա ասվել է առանց հատուկ ակնարկների, դա նույնիսկ պարզաբանվել է բավականաչափ միանշանակ` ամենատարբեր մակարդակներում` նախագահի գլխավորությամբ: Ես պարզապես կարող եմ հիշեցնել այդ խոսքերը»,- ասել է նա լրագրողներին` հավելելով, որ Թուրքիան այդ ուղղությամբ մինչ օրս ոչ մի քայլ չի արել: