Զոհված զինծառայողների ընտանիքների անդամները կարող են անվճար սովորել Հյուսիսային համալսարանում

Այս տարի լրանում է Հյուսիսային համալսարանի հիմնադրման 20-ամյակը: Այսօր բուհում «Հյուսիսային համալսարանի դիմակայությունը 21-րդ դարի մարտահրավերներին» խորագրով գիտական խորհրդի ընդլայնված նիստ էր, որին մասնակցում էր նաև ՀՀ ԿԳ նախարար Լևոն Մկրտչյանը: Նիստը սկսվեց 1 րոպե լռությամբ` ի հիշատակ Արցախում զոհված զինծառայողների:

Նախարարը նշեց, որ 20 տարվա պատմությունը բուհի համար բավական լուրջ այցեքարտ է: Հյուսիսային համալսարանը, ըստ նրա, կայացած բուհ է, որն ապրում է իր կյանքով, ունի քաղաքացիական ակտիվություն:

«Համալսարանը մեկն է այն բուհերից, որն ակտիվորեն մասնակցեց նաև Ցեղասպանության 100-րդ տարելիցի միջոցառումներին: Ես վստահորեն կարող եմ ասել, որ բուհում ձևավորվել է հայրենասիրության դրական մթնոլորտ: Մեր երկրին սպասվում է բավական բարդ շրջան, և հույս ունեմ, որ համալսարանը կմնա իր դիրքերում»,- ասաց նախարարը:

Բուհի ռեկտոր Բորիս Մակիչյանն էլ նշեց, որ բուհն իր առաքելությունն ունի, և իրենց համար առաջին հերթին կարևոր է  լավ քաղաքացի դաստիարակելը: «Ապրիլյան ծանր օրերին մենք մեր ուսանողների հետ կամավորական խումբ էին ձևավորել` 100 հոգուց կազմված, սակայն, բարեբախտաբար, պատերազմն ավարտվեց, և մեր կարիքը չեղավ, սակայն մենք կազմ ու պատրաստ ենք: Ի դեպ, ասեմ նաև, որ այդ օրերին զոհված զինծառայողների ընտանիքների անդամները մեզ մոտ անվճար սովորելու հնարավորությւոն ունեն, նրանց նաև հանրակացարանով կապահովենք»,- ասաց ռեկտորը:

Բուհն, ի դեպ, ՀՀ ՊՆ-ից պատվոգիր է ստացել` այդ օրերին բանակի կողքին կանգնելու և աջակցելու համար: