Արցախում վիրավորված 28-ամյա սպան դուրս գրվեց այրվածքաբանական կենտրոնից

ՀՀ ԱՆ ճառագայթային բժշկության և այրվածքների գիտական կենտրոնում բուժվող` ապրիլյան մարտական գործողությունների ժամանակ  երկու վիրավորվածներից մեկը` 28-ամյա սպա Արսեն Առաքելյանն այսօր ապաքինված դուրս է գրվել: 

Կենտրոնի տնօրեն Նորայր Դավիդյանի հաղորդմամբ` զինծառայողը վերականգողական բուժումը կշարունակի Արցախում` Երևանի մասնագետների հետ գտնվելով մշտական կապի մեջ: 

Նշենք, որ ապրիլյան պատերազմի ժամանակ Արցախի բանակի սպան դեմքի, ձեռքերի ու մարմնի այլ հատվածներում 4-րդ և 3-րդ աստիճանի այրվածքներ էր ստացել: Առաջին բուժօգնությունը Մարտակերտի հոսպիտալում, այնուհետև` Ստեփանակերտում ցուցաբերելով՝ նրան տեղափոխել էին Երևան:

ՀՀ ԱՆ Ճառագայթային բժշկության և այրվածքների գիտական կենտրոնում բուժումը կշարունակի 48-ամյա ԵԿՄ անդամ Գևորգ Ազոյանը, ում մոտ առկա են բազմաբեկորային վնասվածքներ: Նախորդ շաբաթ նա ենթարկվել է պլաստիկ վիրահատության: Բժիշկների հավաստմամբ` այս վիրավորը հաջորդ շաբաթվա սկզբին նույնպես դուրս կգրվի բժշկական հաստատությունից:

 Առողջապահության նախարարություն