Օլիմպիական կրակի էստաֆետը մեկնարկեց

 Բրազիլիայի Պլանալտու պալատից` երկրի նախագահի նստավայրից,  մեկնարկել է Օլիմպիական կրակի էստաֆետը: Օլիմպիական կրակը Բրազիլիա է բերվել ինքնաթիռով` շվեյցարական Լոզան քաղաքից` Միջազգային օլիմպիական կոմիտեի  գլխավոր գրասենյակը:
Հանդիսավոր արարողության ժամանակ Բրազիլիայի նախագահ Դիլմա Ռուսեֆը  օլիմպիական ջահը հանձնել է Բրազիլիայի հավաքականի կազմում ընդգրկված վոլեյբոլի երկակի օլիմպիական չեմպիոնուհի Ֆաբիանա Կլաուդինոյին:
Օլիմպիական ջահը երկրով մեկ կտանեն 12 000 մարզիկներ:
Նշենք, որ մինչև «Ռիո-2016» Օլիմպիական խաղերի մեկնարկը մնացել է  95 օր. օլիմպիական կրակը 20 000 կմ տարածություն կանցնի և օգոստոսի 5-ին կհասնի Ռիո դե Ժանեյրոյի «Մարականա» մարզադաշտ: