Նովոռոսիյսկում առգրավել են վրացական «փաթեթավորմամբ» թուրքական մանդարիններ

Նովոռոսիյսկում մաքսային ծառայության աշխատակիցները արգելել են Վրաստանից 107 տոննա մանդարինի ներկրումը երկիր, քանի որ դրա մեկ երրորդից ավելին թուրքական արտադրության է եղել: Այդ մասին ТАСС-ի թղթակցին հայտնել է ՌԴ Մաքսային դաշնային ծառայության հարավային վարչության մամուլի քարտուղարը:

«Մանդարինի խմբաքանակը բերվել էր վրացական Փոթի նավահանգստից: Որպես բեռն ուղարկող` նշված էր վրացական մի ընկերություն: Ֆիտոսանիտարական հավաստագրերն էլ տրված էին Վրաստանի պարենի ազգային գործակալության կողմից: Զննման արդյունքում պարզվեց, որ մոտ 40 տոննան Թուրքիայից է, մյուս քանակությունը` Աբխազիայից ու Վրաստանից»,- ասել է նա` հավելելով, որ արդյունքում` ամբողջ խմբաքանակը վերադարձվել է Վրաստան:

Բեռնափոխադրողի դեմ հարուցվել է քրեական գործ` Մաքսային միության տարածք արգելված ապրանքներ ներկրելու փաստով:

Հիշեցնենք, որ Սիրիայում թուրքական զինված ուժերի կողմից ռուսական Սու-24 ռմբակոծիչի խոցումից հետո ՌԴ-ն 2016-ի հունվարից 1-ից արգելել է թուրքական մի շարք պարենամթերքների ներկրումը: