Մարսելի փոխքաղաքապետի գլխավորությամբ 18:00-ին բողոքի ցույց է մեկնարկելու՝ ընդդեմ ադրբեջանա-թուրքական ագրեսիայի

Այս օրերին Հայաստանի լավագույն բարեկամներից մեկը՝ Ֆրանսիայի Ազգային Ժողովի պատգամավոր Վալերի Բուայեն ակտիվ գործում է՝ ընդդեմ Ադրբեջանի սանձազերծած ագրեսիայի:

Հիշեցնենք, Վալերի Բուայեն ֆրանսիացի քաղաքական գործիչ է, Ֆրանսիայի Ազգային Ժողովի պատգամավոր և Մարսելի փոխքաղաքապետ: 2011թ Ֆրանսիայի ԱԺ-ն Վալերի Բուայեի առաջարկությամբ ընդունեց Հայոց Ցեղասպանության ժխտումը քրեականացնող օրինագիծ, որն էլ հետագայում ընդունվեց Ֆրանսիայի սենատի կողմից:

Սույն թվականի ապրիլի 2-ին, երբ սկսվեցին Ադրբեջանի կողմից լայնածավալ ռազմական գործողությունները ԼՂ հենակետերի ու քաղաքացիական բնակավայրերի ուղղությամբ, Վալերի Բուայեն անմիջապես արձագանքեց իր թվիթերյան և ֆեյսբուքյան էջերում:

Այսպես՝ իր թվիթերյան էջում ֆրանսիացի պատգամավորը գրել էր. «Սիրելիներս, մեր բոլորի մտքերը Ադրբեջանի կողմից հարձակման ենթարկված Լեռնային Ղարաբաղի մեր հայ ընկերների հետ են: Եվս մեկ անգամ քրիստոնյաները ենթարկվում են հարձակման: Լիակատար աջակցություն ենք հայտնում Լեռնային Ղարաբաղի ժողովրդին»:

Ֆեյսբուքյան էջում Մարսելի փոխքաղաքապետը գրել է . «Լեռնային Ղարաբաղը կրկին ենթարկվել է Ադրբեջանի հարձակմանը: Իրավիճակը ծանր է: Լիակատար աջակցություն ենք հայտնում հայ ժողովրդին եւ Լեռնային Ղարաբաղին»:

Ավելին՝ Վալերի Բուայեն կազմակերպել է բողոքի ցույց Մարսելի քաղաքապետարանի դիմաց, որը մեկնարկելու է երկու ժամից: Բուայեն ֆեյսբուքյան իր էջում տեղադրում է հայ զինվորների նկարներ և պաստառներ, որոնք կոչ են անում դադարեցնել Հայաստանի ու Արցախի դեմ սանձազերծած թուրք-ադրբեջանական ագրեսիան:

«Մենք խորհրդարանականներով պետք է հավաքվենք ու պայքարենք, որ ԵԱՀԿ-ն ԼՂ հարցը նորից ընդգրկի բանակցությունների օրակարգում՝ հակամարտության գոտում խաղաղություն հաստատելու նպատակով»,- կոչ է արել Բուայեն: