Բազմահազարանոց ցույց Լոս Անջելեսում՝ ընդդեմ ադրբեջանական ագրեսիայի

ԱՄՆ Լոս Անջելես քաղաքում բազմահազարանոց բողոքի ցույց է տեղի ունեցել. հազարավոր լոսանջելեսահայեր հավաքվել են Ադրբեջանի հյուպատոսության շենքի առջև՝ բողոքելով Ադրբեջանի վերջին հարձակումների դեմ՝ Արցախի ամբողջ սահմանի երկայնքով:

Ցուցարարները նաեւ դատապարտել են Ղարաբաղյան հակամարտության մեջ Թուրքիայի լկտի և հանցավոր միջամտությունը:

Ցույցն այնքան բազմամարդ էր, որ Լոս Անջելեսի Բրենտվուդ թաղամասում գտնվող Վիլշիր Բուլվարի բանուկ հատվածը փակվել է ամբողջ ակցիայի ընթացքում:

Ցույցը կազմակերպել էր Լոս Անջելեսի Հայ Երիտասարդաց Դաշնակցությունը:

Ի տարբերություն հուլիսին նմանատիպ բողոքի ցույցի, երբ մի խումբ ադրբեջանցիներ խափանեցին միջոցառումը, բռնություն հրահրելով և ցուցարարներին սպառնալով, այսօր բողոքի ցույցը խաղաղ է անցել: