Թուրքիայում տագնապ է հայտարարվել՝ 5 ահաբեկչական հարձակում է տեղի ունեցել

Երեկ Թուրքիայի Բայրամփաշա շրջանում ոստիկանական բաժանմունքի վրա տեղի ունեցած զինված հարձակման ընթացքում երկու կին ահաբեկչներ նռնակ էին նետել ոստիկանատան ուղղությամբ և հրաձգությունից հետո  փախուստի դիմել, այնուհետև՝ սպանվել: Ահաբեկչական հարձակմանը հաջորդել են նորերը:

Ըստ Demokrathaber-ի՝ երեկոյան ժամերին անհայտ անձինք կրակ են բացել ոստիկանական ավտոբուսի վրա: Կրակոցների հետևանքով ուղեկցող մեքենան բռնկվել է, սակայն զոհեր չեն գրանցվել: 

Երրորդ հարձակումը տեղի է ունեցել Օքմեյդանը շրջանում: Այստեղ կրակ են բացել հերթապահություն իրականացնող ոստիկանների զրահապատ մեքենայի ուղղությամբ: Հարձակվողները փախուստի են դիմել ոտքով: Տուժածներ չեն եղել:

Նույն ժամին հարձակում է տեղի ունեցել նաև Քաղըթհանե Նուրթեփե շրջանում հերթապահություն իրականացնող ոստիկանների մեքենայի ուղղությամբ:

Զինված հարձակման թիրախ է դարձել նաև  Ֆաթիհ Սուլթան Մեհմեթ համալսարանի ռեկտորին պատկանող մեքենան։ Նրա մեքենայի ուղղությամբ կրակել են ինքնաձիգներից, ինչի հետևանքով վիրավորվել է ռեկտորի վարորդը: 

Զինված հարձակումներ են եղել նաև Սարըյերում գտնվող ոստիկանական դպրոցի մոտ: Կրակոցների ձայն լսելուց հետո մեծ թվով ոստիկաններ են ուղարկվել դեպքի վայր: Պնդումների համաձայն՝ դպրոցի մոտակայքում մեքենայի միջից անհայտ անձը կրակ է արձակել այդ ուղղությամբ, սակայն տուժողներ չեն եղել: Ոստիկանությունը տագնապ է հայտարարել: