Դատարկ վահանակները կլրացվեն սոցիալական գովազդով, որի համար տուրք չի գանձվելու

Այսօր կառավարության նիստում մշակույթի նախարար Հասմիկ Պողոսյանը ներկայացրեց որոշման նախագիծ, որը պայմանավորված է գովազդի ոլորտում եղած խնդիրները կանոնակարգելու, մասնավորապես` սոցիալական գովազդի ոլորտում բարենպաստ օրենդրական միջավայր ստեղծելու անհրաժեշտությամբ: Այդ նպատակով փոփոխություն է կատարվում «Գովազդի մասին» օրենքում: Սահմանվում է «սոցիալական գովազդ» հասկացությունը, և լրացում է սահմանվում, որ արտաքին գովազդակիրը պարտավորվում է իր կազմակերպության գովազդը տեղադրելու համար վճարել սահմանված տուրք, սակայն այդ տուրքից նա ազատվում է, եթե խոսքը վերաբերում է սոցիալական գովազդին:

«Սոցիալական գովազդը կարող է տարածվել ՀՀ ամբողջ տարածքում: Պետք է լինեն հանձնաժողովներ, որոնք նախապես պետք է քննարկեն սոցիալական գովազդի բովանդակությունը՝ այն սոցիալական գովազդ որակավորելու համար: Նաև սահմանվում է, որ սոցիալական գովազդի տեղաբաշխման պատվեր կարող է ներկայացնել ցանկացած ֆիզիկական և իրավաբանական անձ»,- ասաց մշակույթի նախարարը՝ հավելելով, որ նախագծի ընդունմամբ մարզերի դատարկ վահանակների խնդիրն էլ կլուծվի:

Վարչապետ Հովիկ Աբրահամյանը հավելեց, որ դա կարևոր նախաձեռնություն է, և որ իսկապես մարզերում և ավտոմայրուղիներում շատ են դատարկ վահանակները: Վարչապետը նշեց, որ պետք է հետամուտ լինել, որ ԱԺ-ն հնարավորինս շուտ ընդունի այդ նախագիծը: