ԼՂՀ արվեստի վաստակավոր գործչի կոչում՝ տիկնիկագործ Մելիք Վարդանյանին

ԼՂՀ մշակույթի և երիտասարդության հարցերի նախարարությունից տեղեկացնում են, որ նախարար Նարինե Աղաբալյանը ծննդյան  85-րդ տարեդարձի առթիվ հայրենի Ջրակուս գյուղում շնորհավորել և փայտարվեստի վարպետ Մելիք Վարդանյանին  է հանձնել ԼՂՀ արվեստի վաստակավոր  գործչի պատվավոր կոչումը:

Մելիք Վարդանյանը երկար տարիներ աշխատել է ԼՂՀ Հադրութի շրջանի Ջրակուս գյուղում` որպես ռուսաց լեզվի ուսուցիչ, 17 տարի աշխատել է` որպես նույն դպրոցի տնօրեն: Մասնակցել է արցախյան ազատագրական պայքարին: Փայտարվեստի ինքնուս վարպետ է, ունի ժողովրդական վարպետի համբավ: Տիկնիկագործությամբ լրջորեն սկսել է զբաղվել 1965թ-ից: Հեղինակ է երեք տասնյակից ավելի թեմատիկ աշխատանքների, որոնցում ներկայացված են արցախյան կենցաղն ու ազգային ավանդույթները: 1977թ. Մոսկվայում կայացած «Հայրենիքի ինքնուս վարպետները» փառատոնում նրա «Խնոցի», «Երկանք», «Ճախարակ», «Բրուտագործը» աշխատանքներն արժանացել են ոսկե մեդալի և առաջին կարգի դիպլոմի: Բազմիցս մասնակցել է խմբային ցուցահանդեսների, անհատական ցուցահանդեսներով հանդես է եկել Երևանում, Բաքվում և Ստեփանակերտում: Երկարատև մանկավարժական գործունեության համար արժանացել է «20-րդ դարի լավագույն մանկավարժ» կոչմանը: Մ. Վարդանյանը մեծ ավանդ ունի Արցախի ոչ նյութական մշակութային ժառանգության պահպանման, հանրահռչակման և դեկորատիվ-կիրառական արվեստի զարգացման գործում: 2009 թվականին շնորհվել է  ԼՂՀ «Երախտագիտություն» մեդալ:

Հիշեցնենք, որ  ԼՂՀ նախագահ Բակո Սահակյանի՝ 2016 թ. հունվարի 22-ի  հրամանագրով՝ ոչ նյութական մշակութային ժառանգության պահպանման, տարածման և զարգացման գործում ունեցած նշանակալի ավանդի համար փայտարվեստի վարպետ Մելիք Վարդանյանին շնորհվել է Լեռնային Ղարաբաղի Հանրապետության արվեստի վաստակավոր գործչի կոչում: