Կյանքից հեռացել է արվեստի վաստակավոր գործիչ Զավեն Վարդանյանը

Արվեստի վաստակավոր գործիչ Զավեն Վարդանյանը մահացել է։

Մաեստրո, դիրիժոր Զավեն Վարդանյանը ծնվել է 1943 թվականին Հալեպում։ 1947 թվականին հայրենադարձել է։ 1974 թվականին ավարտել է Երևանի Կոմիտասի անվան պետական կոնսերվատորիայի դիրիժորական ֆակուլտետը։

1974-1979 թվականներին եղել է Հայաստանի պետական սիմֆոնիկ նվագախմբի դիրիժորի օգնական, 1979 թվականին հիմնել է Երևանի պետական կամերային նվագախումբը, որը ղեկավարել է մինչև 1990 թվականը։ 1994-2000 թվականներին եղել է Երևանի Ալեքսանդր Սպենդիարյանի անվան օպերայի և բալետի պետական թատրոնի դիրիժոր։ 2003 թվականին տեղափոխվել է Կուենկա, դասավանդել Կուենկայի պետական համալսարանում, ղեկավարել տեղական սիմֆոնիկ նվագախմբերը։

24News-ի խմբագրակազմը ցավակցում է անվանի դիրիժորի ընտանիքին, հարազատներին։

Հոգեհանգստի արարողությունը տեղի կունենա Կոնդի Սուրբ Հովհաննես եկեղեցում շաբաթ երեկոյան՝ ժամը 17:30-ին։ Վերջին հրաժեշտի արարողությունը տեղի կունենա Կոմիտասի անվան կամերային երաժշտության տնից կիրակի՝ ժամը 11:00-13:00-ին։