Գագիկ Բեգլարյանը լավ է աշխատում. Միքայել Մելքումյան

ԱԺ-ում «Ավտոմոբիլային ճանապարհների մասին» օրենքի նախագծի քննարկման ժամանակ ելույթ ունեցավ ԲՀԿ խմբակցության պատգամավոր Միքայել Մելքումյանը: Նշենք, որ նախագծով առաջարկվում է ավտոմոբիլային ճանապարհներով 40 տոննա բեռների տեղափոխումն արգելել, քանի որ ճանապարհներին մեծ վնաս է հասցվում:

Մելքումյանը նշեց, որ առկա է 50 հազարից ավելի խոշոր տեխնիկա, այդ թվում` շուրջ 15 հազար տրակտոր: Պատգամավորին մտահոգում է, թե այս նախագծի ընդունումից բիզնեսը կամ, ընդհանրապես, տնտեսվարողները ինչ-որ բան շահո՞ւմ են, թե՞ տուժելու են: «Եթե մենք շահում են ինչ-որ բան, բայց բիզնեսը ռիսկեր ունի, պետք է անպայման նկատի ունենանք»,- ասաց նա:

Մելքումյանը նշեց նաև, որ ինքը, շատ մոտ կանգնած լինելով տրանսպորտի և կապի նախարարությանը, չի կարող չասել, որ նախարար Գագիկ Բեգլարյանը լավ է աշխատում: «Դա հստակ այդպես է, նենց չի, որ մենակ պետք է քննադատենք: Կան նախարարներ և նախարարություններ, որոնք լավ չեն աշխատում, բայց տվյալ դեպքում պետք է ասել, որ Գագիկ Բեգլարյանը, ճանապարհաշինության մասով, որոշակի ձեռքբերումներ ունի, և մենք դա պետք է արձանագրենք»,- հայտարարեց պատգամավորը: