Վարչապետը չի ցանկանում որոշ նախարարների հետ տհաճ խոսակցություն ունենալ

Այսօր կառավարության նիստում գյուղատնտեսության նախարար Սերգո Կարապետյանը ներկայացրեց «Գյուղատնտեսական կոոպերատիվների մասին» և «Քաղաքացիական օրենսգրքում փոփոխություն կատարելու մասին» նախագծերի փաթեթը, որով նախատեսվում է խթանել կոոպերացիաների ստեղծումը: Վերջին տարիներին գյուղատնտեսությունում գրանցված որոշակի դրա­կան տեղաշարժերի հետ մեկտեղ, ոլորտում բնատնտեսական ներուժի օգտագործման մակարդակը դեռևս ցածր է, որի հիմնա­կան պատճառնե­րից մեկը հանրապետության գյուղացիական տնտեսություն­ների փոքր չափերն են և տնտեսությունների համատեղ գործունեության ձեռնարկում­ների դանդաղ ընթացքը: Ուստի անհրաժեշտություն է առաջանում տարբեր լծակներով և մեխանիզմներով խթան­ել համա­տեղ տնտեսվարման զարգացումը, գյուղատնտեսական կոոպերատիվների կազմակերպման միջոցա­ռում­ների իրականացումը: Կոոպերացիայի տարբեր ձևերի համակարգում իր ուրույն տեղն ունի գյուղատնտեսական կոոպերացիան, որի սկզբունքների արդյունավետ կիրառումն ու օգտագործումը կնպաստի հանրապետության ագրարային ոլորտի խնդիրների հանգուցալուծմանն ու գյուղատնտեսության հետագա զարգացմանը: Առաջացել է անհրաժեշտություն օրենքի նախագիծ ընդունել և կարգավորել կոոպերացիաների զարգացման ոլորտը:

Հովիկ Աբրահամյանը նշեց, որ այս օրենքի առումով ունի դժգոհություն` ուղղված թե\' էկոնոմիկայի, թե\' գյուղատնտեսության, թե\' արդարադատության նախարարության ղեկավարությանը: Նա հորդորեց այդ նախարարություններին` գույքագրել իրենց պարտավորությունները, քանի որ տարին ավարտվում է, և ինքը չէր ցանկանա տհաճ խոսակցություն ունենալ այդ թեմայով:

«Հիմա սա ընդգրկվելու է, չէ՞, արտահերթ նստաշրջանում: Հիմա պետք է գնանք ԱԺ ու երեք ընթերցում անցկացնենք, որը շատ վատ է»,- դիտողություն արեց Հովիկ Աբրահամյանը: