Տեր-Պետրոսյանի լիդերությունը տեսել ենք, հերի՛ք ա. Տիգրան Կարապետյան

ՀՀ առաջին նախագահ Լևոն Տեր-Պետրոսյանն այսօր հանդես է եկել հրապարակմամբ և խոսել սահմանադրական բարեփոխումների մասին: Նա նշել է, որ սահմանադրական հանրաքվեն «անկանխատեսելի հետևանքներով հղի արկածախնդրություն է»:

«Ժողովրդական» կուսակցության ղեկավար Տիգրան Կարապետյանը Yerkir.am-ի հետ զրույցում կարծիք հայտնեց, որ առաջին նախագահի` ժամանակ առ ժամանակ քաղաքական ասպարեզում երևալու ձգտումները, տարատեսակ հայտարարարություններով հանդես գալը, ոչ այլ ինչ է, եթե ոչ լիդերության ձգտելու հակում:

«Տեր-Պետրոսյանը մի վեց տարի առաջ էլ էր խոսում, խոստումներ տալիս: Ժողովրդին բարձրացնում է, ոտքի է հանում ու չի հասնում արդյունքի կամ չի ուզում հասնել, հիասթափեցնում է… Դա պարզապես փաստ է: Ինչ վերաբերում է բարեփոխումներին, ասեմ, որ ես չեմ հասկանում այդ մարդկանց: Ախր, եթե այսօր վատ ենք ապրում, ուրեմն, բարեփոխումներին դեմ գնալով, համաձայնում ենք այսօրվա վիճակին: Որ ասում են` բարեփոխումները չանցնեն ու մնա ներկայիս վիճակը, ուրեմն այս պայմանները բավարար են համարում»,- ասաց Կարապետյանը` հավելելով, որ անարդարության ու սխալի դեմ պետք է հենց հիմքից պայքարել:

«Լևոն Տեր-Պետրոսյանն ուզում է լիդեր լինի, եղել ա, տեսել ենք իրա լիդերությունը, հերի՛ք ա»,- հայտարարեց նա: