Թուրքիայում քրդամետ պատգամավորները հացադուլ են հայտարարել

Թուրքիայում քրդամետ Ժողովուրդների դեմոկրատական կուսակցության` Նուսաբեյին շրջանից պատգամավորներ Ալի Ալթանն ու Գյուլսեր Յըլդըրըմը հացադուլ են հայտարարել:

Ըստ Radikal-ի՝ պատգամավորների այդ որոշման պատճառը Նուսաբեյին շրջանում արդեն վեց օր շարունակվող` փողոց դուրս գալու արգելքն է:

Պատգամավոր Ալթանը հայտնել է, որ խնդրին արմատական լուծում տալու համար պետք է անհապաղ հանդիպել Քրդական բանվորական կուսակցության` ցմահ բանտարկված առաջնորդ Աբդուլլահ Օջալանի հետ:

Հացադուլ հայտարարած պատգամավորները նաև չեն մասնակցել մեջլիսում անցկացված պատգամավորական երդմանը:

Հիշեցնենք, որ Նուսաբեյին շրջանում քուրդ զինյալների և թուրք զինվորների միջև տեղի են ունենում հզոր բախումներ: Նոր զոհեր չգրանցվելու համար շրջանում արդեն վեց օր է` արգելված է փողոց դուրս գալը: