Օբաման եւ Պուտինը խոսել են Սիրիայի մասին եւ համաձայնության եկել

ՌԴ և ԱՄՆ նախագահներ Վլադիմիր Պուտինն ու Բարաք Օբաման Թուրքիայում անցկացվող G20-ի գագաթաժողովի շրջանակներում առանձնազրույց են ունեցել, որի ընթացքում քննարկել են Սիրիայում և Ուկրաինայում տիրող իրավիճակը:

Ինչպես տեղեկացնում է «ՌԻԱ Նովոստին», խոսելով սիրիական ճգնաժամից կողմերը նախ արձանագրել են, որ  նախօրեին Վիեննայում տեղի ունեցած բանակցությունները հաջող են անցել, ապա երկկողմ համոզմունք հայտնել, որ Սիրիայում անհրաժեշտ է քաղաքական տրանսֆորմացիա, որը պետք է իրականացնեն եւ վերահսկեն սիրիացիները, իսկ այդ գործընթացին պետք է նախորդեն  սիրիական ընդդիմության եւ Ասադի վարչակազմի միջեւ բանակցությունները` ՄԱԿ-ի միջնորդությամբ: 

Ի դեպ, Օբամա-Պուտին առանձնազրույցը տեւել է մոտ 35 րոպե, թեեւ երկկողմ հանդիպում նախատեսված չի եղել: