Հնդկաստանում բրիտանական թագուհուց պահանջում են վերադարձնել թագը զարդարող հնդկական առասպելական ադամանդը

Հնդկաստանը Մեծ Բրիտանիայից պահանջում է վերադարձնել աշխարհի ամենահայտնի ադամանդներց մեկը` «Կոհինորը»: Times of India-ի տեղեկացմամբ, մտավորականներից ու քաղաքական էլիտայի անդամներից կազմված  նախաձեռնող խումբը հայց է նախապատրաստում Մեծ Բրիտանիայի թագուհի Ելիզավետա Երկրորդի դեմ` նոյեմբերի 12-15-ը Հնդկաստանի վարչապետի` Լոնդոն այցելությանն ընդառաջ:

Նրանք նշում են, որ աշխարհին հայտնի ադամանդն իրենց ազգային հարստությունն է, եւ այն բազմաթիվ արժեքներից միայն մեկն է, որ բրիտանացիները դուրս են բերել Հնդկաստանից «կասկածելի հանգամանքներում»:

«Կոհինոր» ադամանդն աշխարհի հնագույն եւ նշանավոր  ադամանդներից է: Ըստ ավանդության նա գտնվել է 5 հազար տարի առաջ` Հարավային Հնդկաստանում: Նրա առաջին տերը եղել է Արեւի աստծո որդին` առասպելական Կարնան` հնդկական «Մահաբհարատա» էպոսի հերոսը:  Մինչեւ 1304 թվականը ադամանդը պատկանել է հնդկական ռաջաների դինաստիային, այնուհետեւ անցել ձեռքից ձեռք, իսկ 1739 թվականին պարսից Նադիր շահը, նվաճելով Հնդկաստանը, յուրացնում է նաեւ ադամանդը  եւ հենց ինքնէլ անվանում է այն «Կոհինոր»` «Լույսի սար»:

Դարեր անց Հնդկաստան վերադարձված ադամանդը 1850 թվականին  որպես պարգեւ հանձնվում է Անգլիայի Վիկտորյա թագուհուն:

108.9 կարատանոց ադամանդն այդ ժամանակներից զարդարում է բրիտանական թագը, որն այսօր կրում է Ելիզավետա Երկրորդը: