Ըստ նախարարի` հիվանդների`ՀՀ-ից ԱՊՀ ուղեգրելու մեջ քաղաքական կոմպոնենտ չկա

ԱԺ առողջապահության, մայրության և մանկության հարցերի և բյուջետային հարցերի մշտական հանձնաժողովների համատեղ նիստում 2016 թվականի պետական բյուջեի օրենքի նախագծի քննարկման ընթացքում «Ժառանգություն» խմբակցության պատգամավոր Թևան Պողոսյանը նշեց` նկատել է, որ Հայաստանից դուրս ուղեգրված հիվանդների ճանապարհային ծախսի և բուժման հատկացումների հարցում հիմնականում ԱՊՀ երկրներ են ըմտրվում: Նա հետաքրքրվեց՝ ինչի՞ հետ է կապված այդ հանգամանքը, և արդյո՞ք քաղաքական խնդիր է, որ ընտրությունը կանգ է առնում ԱՊՀ երկրների վրա, քանի որ, ըստ նրա, օնկոլոգիական հիվանդներն առնվազն կնախընտրեն գնալ Գերմանիա, ԱՄՆ, Ֆրանսիա:

«Ուզում եմ հարցնել` պատրաստվո՞ւմ եք քաղաքական կոմպոնենտը հանել, քանի որ խոսքը որակի մասին է»,- հարցրեց պատգամավորը:

Առողջապահության նախարար Մուրադյանը, Պողոսյանի հարցադրմանն ի պատասխան, ասաց, որ  որևէ քաղաքական կոմպոնենտ չկա այն բանում, որ ՀՀ-ից ԱՊՀ-ն են ուղեգրում հիվանդներին: «Տեսնում ենք հնարավորությունը և քանակը և ըստ այդմ էլ բաշխում ԱՊՀ երկրների վրա»,- ասաց նա` հավելելով, որ ԱՊՀ երկրների որակն էլ վատը չէ: