Էրեբունի-Երևանը եղել է, միշտ պետք է լինի ու բոլոր չուզողների աչքն էլ հանի. Հրանտ Թոխատյան

Այսօր Երևանի ավագանու նիստից հետո դերասան Հրանտ Թոխատյանը լրագրողների հետ զրույցում անդրադարձավ նաև այն հարցին, որ մի շարք քաղաքացիներ պահանջում էին տոնակատարության գումարի մի մասը հատկացնել սահմանամերձ համայնքներում ինչ-որ խնդրի լուծման համար:

Նա նշեց, որ, որպես ավագանու անդամ, չի կարողանում անընդհատ լինել սահմանամերձ գյուղերում, բայց կարողանում է սահմանամերձ գյուղից յուրաքանչյուր իր ներկայացմանը 100 երիտասարդ ու բարձր դասարանների աշակերտ բերել: «Դրա համար ես ինձ ասում եմ` ապրես, Հրա\'նտ: Ես գտնում եմ, որ Էրեբունի-Երևանը եղել է, միշտ էլ պետք է լինի ու բոլոր չուզողների աչքն էլ հանի: Տոնը պետք է լինի հրավառությունով, որովհետև երբ իմ, նաև ձեր երեխան այդ հրավառության ժամանակ գոռում է` ուռռա՜ , դա երջանկություն է»:

Yerkir.am-ի նկատառմանը, որ սահմանամերձ համայնքներից որոշներում ջուր ունենալիս են «ուռռա՜» գոչում, Թոխատյանը պատասխանեց, թե` նույնն էլ մենք էինք, չէ՞, մի ժամանակ, բայց այսօրվա օրով լուծվեց այդ հարցը: «Եկեք` բոլորս միասին անիմաստ խոսելու տեղն օգնենք այդ գյուղերին, գնանք այնտեղ` այստեղ կանգնելու փոխարեն: Գնանք այնտեղ աշխատենք` վարենք, ցանենք, շինարարություն անենք: Ինչո՞ւ եք այստեղ մնացել, հարցեր եք տալիս ինձ, լրագրությա՞մբ եք զբաղված: Տեսնո՞ւմ եք` դուք անում եք ձեր գործը և պատասխանատու եք դրա համար: Եկեք` ամեն մեկս լինենք մեր տեղում ու պատասխանատու լինենք հենց մեր գործի համար»,- ասաց նա: