Ընդդիմությունը պետք է վեր դասենք չուզողների դասից. Վարդան Այվազյան

ՀՀԿ խմբակցության պատգամավոր Վարդան Այվազյանը, այսօր Ազգային ժողովում խոսելով կառավարման ճգնաժամի վերաբերյալ ՀԱԿ խմբակցության ներկայացրած նախագծի մասին, հայտարարեց, որ ընդդիմությունը կարող է ճչալ, բողոքել, բայց դա հին կովկասյան ավանդույթ է:

Նա խոստացավ թարմացնել տեղից իր վերջին արտահայտությանն արձագանքած ՀԱԿ պատգամավոր Հրանտ Բագրատյանի հիշողությունը: «Ընդդիմությունը պետք է վեր դասենք չուզողների դասից: Այս ամենն ինձ հիշեցնում է «Կովկասի գերուհին», երբ ասում է՝ ինքը կարող է ճչալ, բողոքել, դատախազություն դիմել, բայց, սիրելինե՛րս, ձեր գործն արե´ք, դա հին կովկասյան ավանդույթ է», – ընդգծեց Վ. Այվազյանը:

Հիշեցնենք, որ երեկվա իր ելույթում Վարդան Այվազյանն ասել էր. «Բոլորիս համար էլ հասկանալի է, թե ինչ է տեղի ունենում՝ օժիտի հետևից կռիվը սկսված է, պարզապես դեռ լրիվ այրի չի: Ձեր պայքարը՝ լացակումած ու ամպագոռգոռ, շատ հասկանալի է»:

ՀՀԿ պատգամավորը շնորհակալություն հայտնեց Նիկոլ Փաշինյանին՝ նշելու համար, որ ընդդիմությունը լուրջ դեր է կատարում ճգնաժամի հարցում: